05.06.2012 / 14:00

Дызайнерка з Мінска заваёўвае Еўропу 12

Брэнд Farbotka выпускае фетравыя рэчы з матывамі беларускага фальклору.

Цяпер модныя рэчы з беларускім арнаментам, валошкамі, пеўнямі можна купіць у найбуйнейшых польскіх гарадах і пабачыць на вуліцах Еўропы.

Маладая беларуска з Любліна кінула выклік буйным фірмам моды.

Паўгода таму Юлія Фарботка заснавала ўласную фірму па вырабе фетравых сумак. Галоўным матывам яе праектаў стаў беларускі фальклор — арнамент, валошкі і пеўні. Потым Юля выпусціла калекцыю сукенак.
Сёння ў яе фірме працуюць памочнікі, а
прадукцыю з маркай Farbotka можна купіць у найбуйнейшых польскіх гарадах і пабачыць на вуліцах гарадоў еўрапейскіх.
Назва маркі Farbotka паходзіць ад прозвішча яе заснавальніцы. Пасля заканчэння школы ў Мінску Юля паступіла на факультэт педагогікі ў Люблінскім каталіцкім універсітэце. Польскую мову вучыла сама. Аднак яна хутка зразумела, што педагогіка — не яе прызначэнне, і паступіла на факультэт міжнародных адносін у Вышэйшай школе прадпрымальніцтва й адміністрацыі.
Любоў да мастацтва прывілі Юлі бацькі. У таты ў свой час была мэблевая фірма, а маці працавала ў доме моды.
З дзяцінства дзяўчына бачыла, як мама робіць чарцяжы, малюе, шые мноства самых розных рэчаў.

Аднак па-сапраўднаму і ўсур’ёз дызайнерствам Юля занялася ў Польшчы. Усё атрымалася выпадкова, прызнаецца дзяўчына.

«Я пачала з ювелірных вырабаў. Гэта былі ўпрыгожанні са штучных камянёў, срэбра, металу. Я пачала ездзіць у турыстычны гарадок Казімеж Дольны пад Люблінам, прадавала свае творы на рынку. І так усё лета. Шмат прадавала сярод знаёмых, і неяк так атрымалася, што зацікавілася гэтай справай».

Падчас адпачынку ў Беларусі Юля наведала фабрыку абутку з фетру. Ёй вельмі спадабаўся гэты матэрыял, і пасля вяртання ў Люблін яна вырашыла выкарыстоўваць яго ў сваёй працы.

Першыя вышыўкі Юля пачала рабіць на торбах год таму. Праца мела ашаламляльны поспех, і Юля хутка стварыла ўласную фірму.
У снежні мінулага года выйшла першая калекцыя — 12 фетравых сумак.

«Знаёмым спадабалася. Усе казалі: давай яшчэ. Сёння ў маёй фірме працуюць тры чалавекі, а прадукцыя добра прадаецца».

Юля пачынала з нуля.

Рэгістрацыя фірмы заняла адзін дзень. Сродкі на пачатак бізнэсу яна атрымала з бюджэту ЕС. Напісала праект, прайшла кваліфікацыю і атрымала 4,5 тысячы еўра на ўласную справу.

У асартыменце маркі Farbotka — сумкі самых розных памераў і самага рознага фасону: элегантныя, спартыўныя, сумкі для ноўтбукаў, чахлы для мабільнікаў, нават падушкі. Нядаўна Юля выпусціла й калекцыю сукенак. Галоўная адметнасць яе прадукцыі — гэта беларускія нацыянальныя арнаменты й матывы. Пазней Юля пачала дадаваць да сваіх праектаў ўкраінскія, чэшскія, польскія і расійскія акцэнты.

Вельмі часта пакупнікі самі знаходзяць Юлю. Шмат прадаецца праз інтэрнэт. Часам людзі падыходзяць на вуліцы і пытаюцца, дзе яна набывала сукенку і сумку.

Жанчын у сукенках альбо з торбамі маркі Farbotka неўзабаве можна будзе сустрэць і ў Бразіліі, куды Юля плануе наладзіць распаўсюд сваіх тавараў.
У планах таксама выраб сумачак са скуры. На восень Юля хоча выпусціць уласную калекцыю вопраткі Farbotka.

0
Ганна / Адказаць
05.06.2012 / 14:08
"Брэнд Farbotka выпускае фетравыя рэчы з матывамі беларускага фальклору" А цяпер чытаем на яе сайце: Идею, которая вдохновила меня на создание новых проектов, я почерпнула из культурного наследия славянских стран, стараясь показать богатство славянской культуры, ее самобытность и то, что является общим для стран Восточной Европы и их особенностями. Так появилась идея объединить вышивку Лович с чешскими краикaми, русские мотивы с польскими. Я выбираю лучшее в фольклоре для создания оригинальной культурной «смеси».
0
Ганне / Адказаць
05.06.2012 / 14:18
А яшчэ параўнайце з першакрыніцай на Польскім радыё. http://radyjo.net/4/91/Artykul/101314 Даслоўная цытата: Ю. Фарботка: Я вырашыла, што было б добра рэклямаваць нашую народную творчасьць. У нас вельмі шмат прыгожых арнамэнтаў, напрыклад, славутыя слуцкія паясы, беларускія васількі, пеўні. Мне гэта вельмі падабаецца й я вырашыла разрэклямаваць Беларусь.
0
Макс Дизайнер / Адказаць
05.06.2012 / 14:26
Красивые вещи. Но хотелось бы увидеть побольше предметов посвященных отдельно взятым культурам, а не только "лучшее из каждой".На мой взгляд, это узколобый взгляд на вещи.В той же беларуской культуре кроме васильков много других потрясающих по своей красоте орнаментов.Успехов.И да, сколько будет стоить джинсовая сумка с кожаными ручками?
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру