25.03.2007 / 21:41

Магілёў: урачыстая вечарына на Дзень Волі

У Магілёве адбылася ўрачыстая вечарына, прымеркаваная да Дня Волі. На ёй гісторык Ігар Пушкін распавёў грамадзе пра падзеі, якія адбываліся ў Магілёве ў 1917, 1918 гадох. Арганізавала сустрэчу гарадзкая суполка Таварыства Беларускай Мовы.

Грамадзкія й партыйныя актывісты выйшлі на цэнтральныя вуліцы гораду зь бел‑чырвона‑белымі шалікамі. Яны распаўсюджвалі зварот старшыні Рады Беларускай Народнай Рэспублікі Івонкі Сурвілы да грамадзянаў Беларусі, а таксама паштоўкі да Дня Волі.

Міліцыянты ж праз пагрозы адміністрацыйным пакараньнем перапынілі стыхійны мітынг. Ён пачаўся на Савецкай плошчы перад будынкам мясцовага краязнаўчага музэю. Моладзь прыйшла да музэю, каб ускласьці кветкі і ўшанаваць магілёўцаў, якія 12 ліпеня 1918 году ўхвалілі абвяшчэньне Беларускай Народнай Рэспублікі

Па спыненьні акцыі міліцыянты запоўнілі Савецкую плошчу. У прылеглых да яе дварах стаялі машыны з спэцназаўцамі. Тым часам міліцыянты Ленінскай управы Магілёва сканфіскавалі 70 асобнікаў новага выданьня «Магілёўскі час». Пасьля прафіляктычнай гутаркі распаўсюднікаў адпусьцілі. Ці вернуць сканфіскаваныя асобнікі, вырашыць суд.

Паводле радыё «Свабода»

Каб пакінуць каментар, калі ласка, актывуйце JavaScript у наладах свайго браўзеру