Беларусь і В’етнам маюць намер пашыраць супрацоўніцтва па ўсіх напрамках. Аб гэтым ішла размова ў час сустрэчы 11 чэрвеня Аляксандра Лукашэнкі з Надзвычайным і Паўнамоцным Паслом Сацыялістычнай Рэспублікі В’етнам у Беларусі Данг Хыу Чанам у сувязі з завяршэннем яго дыпламатычнай місіі.

«Нам цяжка расставацца з сябрамі, але мы вельмі спадзяёмся, што пасля завяршэння вашай дыпламатычнай місіі ў Беларусі сюды прыедзе такі ж добры, правераны ў дружбе чалавек», — адзначыў Аляксандр Лукашэнка.

Адносіны Беларусі і В’етнама, паводле слоў Аляксандра Лукашэнкі, маюць глыбінныя карані.

«Наша дружба заснавана на святым — сумеснай барацьбе за незалежнасць. У свой час мы нямала зрабілі, каб В’етнам стаў незалежным. Вы таксама нямала зрабілі, каб у нас устанавіліся самыя цесныя, добрыя і дружалюбныя адносіны», — падкрэсліў Лукашэнка.

Ён акцэнтаваў увагу на тым, што беларуска-в’етнамскім дыпламатычным адносінам ужо 20 гадоў. «Гэтыя адносіны з’яўляюцца фундаментам нашай будучыні», — адзначыў Аляксандр Лукашэнка.

Беларуска-в’етнамскі тавараабарот дасягнуў практычна $200 млн.,
але, як лічыць Лукашэнка, гэта мізэр у параўнанні з тым патэнцыялам, якім валодаюць Беларусь і В’етнам.

«Мы маем вельмі салідны дыялог на самым высокім узроўні, — падкрэсліў ён. — І наогул у нас з В’етнамам няма ніякіх праблем. Па міжнароднаму парадку дня у нас адзіныя пазіцыі. Беларусь заўсёды падтрымлівае В’етнам, а В’етнам — Беларусь. Спадзяюся, што так будзе заўсёды».

Аляксандр Лукашэнка адзначыў, што Беларусь гатова ад простага гандлю пераходзіць да больш развітых форм супрацоўніцтва. Ён удакладніў:

«Мы гатовы будаваць сумесныя прадпрыемствы па тых напрамках, якія цікавяць в’етнамскі бок».

Ён канстатаваў, што В’етнам — краіна, якая бурна развіваецца, вельмі багатая на карысныя выкапні. «Мы маем патрэбу ў вас, вы — у нас», — сказаў Лукашэнка. Ён выказаў упэўненасць, што ў бліжэйшыя гады Беларусь і В’етнам змогуць паглыбіць двухбаковае супрацоўніцтва.

«Мы цяпер ідзём па ўсіх напрамках: у Афрыцы знаходзім сяброў і партнёраў, у Амерыцы, Еўропе, Азіі, — сказаў Аляксандр Лукашэнка. — Але В’етнам — гэта асаблівая краіна. Нам не трэба даказваць сваю дружбу і вернасць вашаму народу і дзяржаве. Гэта аснова нашага паглыбленага супрацоўніцтва».

Ён папрасіў перадаць в’етнамскаму кіраўніцтву запэўненні ў гатоўнасці Беларусі актыўна пашыраць супрацоўніцтва з Сацыялістычнай Рэспублікай В’етнам. Беларусь заўсёды гатова прыняць любую дэлегацыю з В’етнама. Беларускія дэлегацыі таксама будуць пастаянна прыязджаць у В’етнам, каб на месцы абмяркоўваць актуальныя тэмы ўзаемадзеяння.

У сваю чаргу Данг Хыу Чан падзякаваў Лукашэнку за магчымасць такой сустрэчы. Ён адзначыў, што адносіны паміж Беларуссю і В’етнамам пастаянна развіваюцца. Але, нягледзячы на добрую дынаміку, сапраўды ёсць вялікі патэнцыял для далейшага развіцця сувязей. В’етнамскі пасол выказаў упэўненасць, што і ў будучым палітычныя, гандлёва-эканамічныя, навукова-тэхнічныя, культурна-адукацыйныя сувязі паміж В’етнамам і Беларуссю будуць пашырацца і ўмацоўвацца.

Хочаш падзяліцца важнай інфармацыяй ананімна і канфідэнцыйна?