З яго працаў выжываюць адзінкі 18

Выцінанкі на вуліцах Мінска

"Слухай бацьку". Анатоль Ярмоленка.

Аляксандр Саладуха.

Героі Беларусі на мінскіх сценах.

Ён просіць не фатаграфаваць свой твар — у беларускіх умовах графіці могуць падвесці пад артыкул «псаванне маёмасці». Фота: Сяргей Гудзілін

Афішная тумба ў Мінску. А на ёй — налепка з Ярмоленкам і надпісам «Слухай бацьку!» Гэта што, такая рэклама? Бачу, побач шансанье Віктар Каліна і надпіс «За пацаноў!» Э, не, гэта не «За Беларусь».

Гэта некага дастала непатрабавальная поп-музыка, што апанавала беларускую эстраду. І гэты мастак дзейнічае супраць «абоймы» яе ж зброяй: іх твары, іх выразы. Лёгкі абсурд гэтай творчасці становіцца выяўным, калі яе вырываюць з кантэксту.

Трапляюцца прынты гордага сабой Аляксандра Саладухі (подпіс — «Здравствуй, чужая мілая») і Паплаўская з Ціхановічам на мяжы цэнзурнасці.

Мастак-графіціст хаваецца пад псеўданімам Dream. Ён просіць не фатаграфаваць свой твар — у беларускіх умовах графіці могуць падвесці пад артыкул «псаванне маёмасці». «Гэта антыподы серыі „Героі Беларусі“, — расказвае ён. — Я іх стварыў літаральна за вечар. Вырашыў зрабіць іх у стылі Шэпарда Фэйры — мастака, які перад выбарамі ў ЗША стварыў партрэт Барака Абамы».

Працы Dream’а бачылі многія. Напрыклад, стэнсілы з выявамі Барбары Радзівіл, Ігната Дамейкі, гетмана Хадкевіча, радкі з класічных вершаў на мінскіх сценах — яго работа.

«У мяне была ідэя — ствараць партрэты выбітных беларусаў на вуліцах, якія носяць іх імёны — расказвае мастак. — Але гэтыя партрэты зафарбоўваюць…» Дурасць, дарэчы. Гэта жывая народная творчасць, дый аздабляе асяроддзе.

Dream штампаваў на сценах і вершы беларускіх класікаў: ад Купалы да Някляева. «Паўстаньце, рабскія натуры!» і гэтак далей. Праўда, «жывуць» такія творы нядоўга, сістэма баіцца слова: «З 20–30 вершаў і болей чым 30 „Славутых сыноў…“ выжылі дзесяць працаў».

Цяпер Dream захоплены новым праектам: ён спрабуе перанесці на гарадскія сцены тэхніку выцінанкі. «Мы перанеслі на сцяну твор майстрыхі выцінанак — цікава выглядае», — кажа Dream.

Падзяліўся мастак і гарачымі навінамі стрыт-арту. «Размаляваная электрычка — гэта не беларусы зрабілі,

— згадаў ён нядаўні выпадак у Мінску, калі ўначы на вагоне з’явіўся агромністы надпіс Bunt. — Прыехала група расійскіх мастакоў».

Сёння, каб мастацтва прыцягвала, трэба ломка шаблону і хуткасць рэакцыі на зменлівы свет:

«Ніхто не глядзіць на плакаты, якія заклікаюць захоўваць чысціню — а мы робім альтэрнатыўныя трафарэты, што называецца, «па жэсці», — кажа Дрым.

***

Конкурс «Унікальная Беларусь. Новы стыль»

Ладзіць Street-art супольнасць Signal. Да ўдзелу запрашаюцца вулічныя мастакі і звычайныя грамадзяне з ідэямі. «У працах трэба адлюстраваць тое, што можа вылучыць Беларусь у сучасным глабалізаваным свеце, паказаць тую Беларусь, у якой хацелі б жыць вы і вашыя сябры. Пажадана (але не абавязкова), каб працы і ідэі былі звязаныя з гісторыяй, культурай, традыцыямі Беларусі», — пішуць арганізатары.

Кантакты: [email protected], signalmag, signal_magazine.

Юрась Ускоў

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ