Латушка: Галоўнае — аднаўленне помнікаў даўніны 11

12–13 чэрвеня ў Мінску праходзіць міжнародная навукова-практычная канферэнцыя «Культура Беларусі: рэаліі сучаснасці», прысвечаная 20-годдзю дзейнасці Інстытута культуры Беларусі.

Падчас форуму абмяркоўваюцца вынікі і дасягненні айчыннай культуры за гады незалежнасці краіны і перспектывы яе развіцця ў кантэксце сучасных сусветных сацыякультурных працэсаў.

На канферэнцыі выступіў міністр культуры Беларусі Павел Латушка. Ён паведаміў аб працы над стварэннем Кодэкса культуры, які павінен быць уведзены ў дзеянне у 2015 годзе. «Гэты прынцыпова новы комплексны акт дазволіць сістэмна аб’яднаць дзейныя прававыя акты, скараціць колькасць норм, будзе садзейнічаць укараненню інавацыйных механізмаў у сферы культуры», — растлумачыў ён.

На думку міністра, трэба і далей рухацца па шляху захавання найлепшых традыцый развіцця нацыянальнай культуры, шырэй прэзентаваць яе за межамі краіны, пашыраць удзел у міжнародных форумах выяўленчага мастацтва, адкрываць нацыянальныя павільёны на буйнейшых культурных мерапрыемствах. «Для гэтага нам трэба павышаць якасць, канкурэнтаздольнасць, інвестыцыйную прывабнасць, прафесійную адукацыю, развіваць экспарт адукацыйных паслуг, падтрымліваць творчыя дэбюты і інавацыйныя праекты моладзі», — перакананы Латушка.

Вызначальным фактарам развіцця дзяржавы ён назваў ахову гісторыка-культурнай спадчыны і аднаўленне помнікаў даўніны. «Гэтаму будзе актыўна спрыяць рэалізацыя дзяржаўнай праграмы „Замкі Беларусі“, — лічыць міністр. — Нашы намаганні будуць накіраваны і на пашырэнне беларускай прысутнасці у Спісе сусветнай спадчыны ЮНЕСКА».

У працы канферэнцыі бяруць удзел прадстаўнікі Азербайджана, Беларусі, Германіі, Кітая, Літвы, Расіі, Турцыі, Украіны, Японіі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ