Лета вернецца да 1 ліпеня 4

Да 1 ліпеня ў Беларусі ўсталюецца па-сапраўднаму летняе надвор’е, паведаміла галоўны сіноптык Рэспубліканскага гідраметэаралагічнага цэнтра Людміла Парашчук 25 чэрвеня падчас відэабрыфінгу.

Паводле яе слоў, на працягу бліжэйшых чатырох дзён атлантычны цыклон стане асноўным фактарам, які фарміруе надвор’е ў Беларусі.

У сувязі з гэтым да чацвярга чакаецца халаднаватае, дажджлівае надвор’е.

Гэтай ноччу па паўднёвым усходзе Беларусі пройдуць дажджы, па Гомельскай і Магілёўскай абласцях — моцныя дажджы. Днём на большай частцы тэрыторыі чакаюцца дажджы кароткачасовага характару, месцамі прагрымяць навальніцы. Тэмпература паветра ноччу 9–15°С, днём 14–20°С, па паўднёвым усходзе на два градусы цяплей. Адчуванне холаду будзе ўзмацняць парывісты заходні вецер.

Паводле слоў сіноптыка, у самыя халодныя суткі, 27 чэрвеня, тэмпература паветра ў начныя гадзіны будзе 6–15°С.

Днём чакаецца ад 13°С на паўночным усходзе да 19°С на паўднёвым захадзе краіны. У многіх раёнах пройдуць кароткачасовыя дажджы, дзе-нідзе — навальніцы. Такі тэмпературны фон будзе на 1–3°С ніжэйшы за звычайны.

У чацвер характар надвор’я істотна не зменіцца.

У пятніцу, калі атлантычны цыклон пойдзе на Паўночны Урал, яго ўплыў на надвор’е аслабее.

Аблокаў і дажджоў стане менш, а па захадзе краіны яны і зусім спыняцца. Тэмпература паветра пачне павышацца, і ў сярэдзіне дня чакаецца 16–22°С.

У суботу дзякуючы антыцыклону надвор’е палепшыцца ў многіх рэгіёнах краіны. Сціхне вецер, праясніцца, тэмпература паветра ноччу 6–11°С, днём 19–25°С, па паўднёвым захадзе Брэсцкай вобласці да 28°С.

Ліпень стартуе добрым летнім надвор’ем. У нядзелю ўсталююцца паўднёва-заходнія ветры, якія пачнуць пастаўляць у Беларусь паветра Міжземнага мора. У нядзелю чакаецца тэмпература паветра ноччу 8–13°С, днём 24–29°С,

на паўднёвым захадзе Брэсцкай вобласці слупкі тэрмометраў паднімуцца вышэй за адзнаку 30°С.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ