25.06.2012 / 19:18

У «Арт Сядзібы» адбіраюць памяшканне 2

Вызваліць памяшканне неабходна да 23 ліпеня.

Адпаведны пісьмовы загад Паўлу Белавусу 25 чэрвеня ўручыла кіраўніцтва прадпрыемства «Гарызонт», дзе «Арт Сядзіба» арандуе памяшканьне ад сьнежня 2011 году.

Як паведаміў «Свабодзе» Павал Беларус, арандадаўцы патлумачылі сваё рашэньне тым, што нібыта гаспадары «Арт Сядзібы» парушаюць правілы пажарнай бясьпекі і прапускны рэжым, а наведнікі ўстановы шмат кураць. У сапраўднасьці прычыны адмовы арэнды зусім іншыя, лічыць Павал Белавус: Апошняй кропляй, відаць, стала правядзеньне сустрэчы з нагоды 10-гадовага юбілею „Бібліятэкі Свабоды“ — кніжнай сэрыі Радыё Свабода.

Арандадаўцы заяўляюць нам, што мы ня маем права праводзіць сустрэчы і розныя іншыя імпрэзы. Але менавіта пра гэта і гаворыцца ў дамове арэнды, бо мэтай адкрыцьця нашай „Арт Сядзібы“ і была рэалізацыя самых розных творчых моладзевых ініцыятываў. Думаю, што насамрэч гэтае рашэньне было прынятае кімсьці і дзесьці звонку».

«Арт Сядзіба» заўсёды пазыцыянавала сябе як беларускамоўны моладзевы асяродак. За сем месяцаў нашай дзейнасьці ў «Арт Сядзібе» адбылося больш за сто творчых імпрэзаў — гэта кінапаказы, літаратурныя вечарыны, мастацкія выставы і моладзевыя дыскусіі. У нас пабывалі тысячы чалавек, і дагэтуль мы не атрымлівалі ніякіх заўвагаў. Мы не засакрэчвалі сваю дзейнасьць і адкрыта паведамлялі і давалі абвесткі пры свае імпрэзы ў сацыяльных сетках. Гэткім чынам у нас зьбіралася вялікая колькасьць грамадзка актыўнай моладзі. І сустрэчы зь вядомымі палітыкамі, мовазнаўцамі, гісторыкамі ці музыкамі, як, да прыкладу, Вінцуком Вячоркам, Пятром Садоўскім, Ігарам Кузьняцовым ці Лявонам Вольскім, не маглі быць незаўважанымі і з боку ўладаў«.

Кіраўніцтва «Арт Сядзібы» мае намер зьвярнуцца да сваіх наведнікаў і прыхільнікаў праз сацыяльныя сеткі з прапановай дасылаць кіраўніцтву «Гарызонту» просьбы адмяніць сваё рашэньне пра скасаваньне арэнднай дамовы. Кожнаму з заяўнікаў прапануецца самастойна абгрунтаваць сваю просьбу пра захаваньне моладзевай пляцоўкі ў займаных памяшканьнях. Акрамя таго, арганізатары «Арт Сядзібы» будуць шукаць новае памяшканьне.

0
Арт Сядзіба / Адказаць
25.06.2012 / 19:21
Падтрымайце "Арт Сядзібу"! Сябры! Вось і ўсё!!! Арэндадаўца ЗАТ "Гарызонт - Белінвест - Дэвелапер" хоча зачыніць "Арт Сядзібу", таму скасоўвае з намі дамову, хоць яна была падпісаная да 31 кастрычніка 2012 году. Нам неабходна пакінуць памяшканьне не пазьней за 23 ліпеня 2012 году. Але ў нас ёсьць час!!! Таму прапануем дзьве акцыі ў падтрымку "Арт Сядзібы": 1. Калі ласка кожны, хто хоць раз бываў у "Арт Сядзібе" напішыце ліст на адрас арэндадаўцы: 220029, г. Мінск, вул. Чырвоная 7, к. 4, дырэктару ЗАТ "Гарызонт - Белінвест - Дэвелапер" Г.П. Азараву з тэкстам: Я, Імя і Прозьвішча, зьвяртаюся да Вас з просьбаю не скасоўваць дамову з ІАУ "Амарока" (Арт Сядзіба), бо "Арт Сядзіба - гэта ... (ваш тэкст, чаму "Арт Сядзібу" не трэба зачыняць?). 2. Калі вы ведаеце ў цэнтры Мінску альбо непадалёку ад цэнтру месца альбо памяшканьне, якое патэнцыйна ў будучым мы маглі б арэндаваць для ўзнаўленьня дзейнасьці "Арт Сядзібы" альбо самыя з'яўляецеся ўладальнікамі памяшканьня ці ведаеце такіх, то калі ласка пішыце на e-mail: artsiadziba@gmail.com Чакаем вашых лістоў і прапаноў: што рабіць далей!
0
Аляксей / Адказаць
25.06.2012 / 20:35
Хлопцы - малайцы! Пратрымацца 7 месяцаў у такім фармаце ў цэнтры Менску - гэта амаль рэкорд. А фінал быў прадказальны ад пачатку. Затое колькі зроблена за гэты час - дай Бог кожнай установе ці суполцы! У кожным разе, "Арт-Сядзіба" мусіць жыць і дзейнічаць далей, у якім месцы - неістотна. Упартасьці і перамогі!
Каб пакінуць каментар, калі ласка, актывуйце JavaScript у наладах свайго браўзеру