Спікер Дзярждумы Расіі прыедзе заўтра

Спікер Дзяржаўнай думы Расіі Сяргей Нарышкін наведае 26 чэрвеня з афіцыйным візітам Беларусь, дзе правядзе перамовы па пытаннях еўразійскай інтэграцыі.

Візіт Нарышкіна ў Мінск адбудзецца па запрашэнні старшыні палаты прадстаўнікоў Нацыянальнага сходу Беларусі Уладзіміра Андрэйчанкі.

«Асноўная ўвага ў ходзе візіту будзе нададзена развіццю міжпарламенцкіх сувязей паміж Расійскай Федэрацыяй і Рэспублікай Беларусь у кантэксце працэсаў еўразійскай эканамічнай інтэграцыі», — гаворыцца ў паведамленні, распаўсюджаным прэс-службай спікера напярэдадні візіту.

У ходзе наведвання Беларусі Нарышкіным запланаваны двухбаковыя сустрэчы з прэм’ер-міністрам Міхаілам Мясніковічам, а таксама са старшынямі палат нацыянальнага сходу Анатолем Рубінавым і Уладзімірам Андрэйчанкам.

У ходзе візіту чакаецца падпісанне пагаднення аб супрацоўніцтве паміж Дзярждумай Расіі і Палатай прадстаўнікоў Беларусі.

Акрамя таго, Нарышкін возьме ўдзел у 42-й сесіі Парламенцкага сходу Саюза Беларусі і Расіі, а таксама выступіць перад студэнтамі і прафесарска-выкладчыцкім складам Акадэміі кіравання пры прэзідэнце.

БелаПАН

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм