Труна зь целам нябожчыка Зьвіяда Гамсахурдыя прыбыла на радзіму: па дарозе картэж з 50 машын сустракалі простыя людзі, якія хацелі разьвітацца зь першым прэзыдэнтам Грузіі. Між тым, улады Тбілісі дагэтуль не дамовіліся зь сям’ёй пра месца захаваньня парэшткаў.
Парэшткі Зьвіяда Гамсахурдыя прыбылі ў Тбілісі. Да суботы яны будуць знаходзіцца ў радавым доме сям’і Гамсахурдыя «Колская вежа» ў цэнтры Тбілісі.
Пасьля афармленьня належных дакумэнтаў на КПП «Верхні Ларс» на грузінска‑расейскай мяжы жалобны паязд 50 машынаў заехаў на тэрыторыю Грузіі: па дарозе яго сустракалі людзі, якія хацелі выказаць свае спачуваньні сваякам Гамсахурдыя. З волі сям’і, пакуль труна ўсталяваная ў «Колскай вежы», мажліва, пазьней яе перанясуць у катэдральны сабор Сьвятой Тройцы, дзе каталікос‑патрыярх усяе Грузіі мае адслужыць паніхіду. Рашэньне пра гэта яшчэ не прынялі, і мажліва, што труну нікуды не павязуць — сям’я вырашыць пазьней.
Пахаваньне першага прэзыдэнта Грузіі мае адбыцца ў суботу, 31 сакавіка. Дзе менавіта пахаваюць Гамсахурдыя, пакуль немаведама.
Як паведаміў раней журналістаў віцэ‑мэр Тбілісі Мамука Ахвледзіяні, пастанавілі пахаваць яго ў пантэоне пісьменьнікаў і грамадзкіх дзеячоў на гары Мтацмінда.
Са словаў Ахвледзіяні, дамоўленасьць пра пахаваньне першага прэзыдэнта Грузіі ў пантэоне на Мтацміндзе дасягнутая зь ягоным сынам Георгіем Гамсахурдыя. Жонка нябожчыка настойвае на тым, каб парэшткі мужа былі пахаваныя ў двары сабору Сьвятой Тройцы. Супраць гэтага выступіла грузінская праваслаўная царква. Тады сям’я прапанавала пахаваць яго ў двары радавога дома 1933 г.
Зьвіяд Гамсахурдыя, які нарадзіўся ў 1939 г., быў прэзыдэнтам Грузіі ў 1991—1992 г. У лютым 1992 г. у час грамадзянскай вайны Гамсахурдыя быў змушаны бегчы ў Грозны, дзе заставаўся да канца 1993 г. 31 сьнежня 1993 г. у адным з паселішчаў Цаленджыскага раёну Грузіі, са словаў асабістай аховы і гаспадара дому, дзе хаваўся прэзыдэнт, Гамсахурдыя скончыў жыцьцё самагубствам, стрэліўшы сабе зь пісталету ў галаву, або быў забіты. У лютым 1994 г. на патрабаваньне жонкі цела Гамсахурдыя была вывезенае з Грузіі і пахаванае ў Грозным. Рэшткі Гамсахурдыя знайшлі і эксгумавалі ў сталіцы Чачэніі 3 сакавіка бягучага году.
