Ніякай перадачы ўлады ў спадчыну ў Беларусі быць не можа, заявіў сёння Аляксандр Лукашэнка, выступаючы на ўрачыстым сходзе, прысвечаным Дню Незалежнасці Рэспублікі Беларусь.
«Я ўсё больш са здзіўленнем чытаю і чую пра тое, што вось тут Лукашэнка — гэта назаўжды, гэта навечна, — сказаў ён. — У які раз кажу, не апраўдваючыся перад вамі… Мае дзеці прэзідэнцтва наеліся пры сваім бацьку. Ніякай перадачы па спадчыне ўлады быць не можа».
Таксама Лукашэнка выказаўся наконт прыватазацыі.
«Я вымушаны зрабіць гэтую заяву, бо ўсё часцей чытаю і чую пра тое, што вось заўтра падзеляць ўсё, што ёсць у Беларусі і беларускага народа. Ужо і спісы ёсць, што і каму. Каму БелАЗ, каму МАЗ, каму калійную кампанію, каму МТЗ, каму яшчэ нешта. І ўжо ўсё ўсім прапісана. Гэтаму не бываць ніколі. Запомніце, пакуль я Прэзідэнт, гэтага ніколі не будзе», — падкрэсліў ён.
Лукашэнка таксама заявіў, што Беларусь зрабіла выбар на карысць незалежнасці, якая імкнецца да інтэграцыі, а таксама спрагназаваў глыбокі крызіс ЕС.
Таксама Лукашэнка сказаў, што Беларусь ніколі не адрачэцца сваёй дзяржаўнасці.
З іншага боку, працягнуў Аляксандр Лукашэнка, незалежнасць дзяржавы — гэта не самамэта, якая існуе дзеля сябе самой, гэта адзін з магутных сродкаў для дасягнення галоўнага — шчаслівага і бяспечнага жыцця людзей.
«Аднак уступаючы ў тыя ці іншыя саюзы або інтэграцыйныя аб’яднанні, мы павінны глядзець не на тое, колькі ў нас застанецца правоў, паўнамоцтваў, суверэнітэту або яшчэ чагосьці, а на тое, што гэта прынясе нашым людзям, нашаму народу, кожнаму чалавеку, — мяркуе Лукашэнка. —
І калі для гэтага патрэбен нейкі кампраміс, нейкі саюз, то мы, безумоўна, павінны ісці на яго. Усё павінна рабіцца для чалавека і ў імя чалавека».
«Але пры гэтым мы павінны памятаць няўхільную ісціну — любая цана мае сваю мяжу. І ёсць базавыя, фундаментальныя рэчы, якімі ахвяраваць ні ў якім разе нельга, і ніводная дзяржава, якая хоча быць суверэннай і незалежнай, на гэтыя ахвяры не пойдзе. Мы ніколі не адмовімся ад сваёй дзяржаўнасцю, зробім усё, каб зберагчы здабытую незалежнасць. Не прэтэндуючы на чужое, не аддамо ні пядзі сваёй зямлі. Ніхто не прымусіць нас прынесці ў ахвяру выпакутаваныя пакаленнямі свабоду нашага народа, — падкрэсліў Аляксандр Лукашэнка. —
Толькі мы самі, народ Беларусі, будзем вызначаць свой лёс і свой шлях развіцця. Нідзе, ні на Усходзе, ні на Захадзе, ні на Поўначы, ні на Поўдні, няма тых сілаў, якія прымусяць нас падпарадкавацца і стаць на калені «
