Цэнтрвыбаркам на пасяджэнні 5 ліпеня прыняў палажэнне аб парадку выкарыстання сродкаў масавай інфармацыі падчас выбарчай парламенцкай кампаніі.
Як паведаміла старшыня ЦВК Лідзія Ярмошына, кожнаму кандыдату будзе давацца па 5 хвілін эфірнага часу, яшчэ 5 хвілін — вядучаму. Гэта значыць, калі ў дэбатах будуць удзельнічаць два кандыдаты, яны будуць доўжыцца 15 хвілін, 5 кандыдатаў — паўгадзіны.
Парадак правядзення дэбатаў Ярмошына назвала самым цяжкім момантам дакумента, бо кандыдатаў будзе шмат — як мяркуецца, на кожную акругу па пяць чалавек, а ў Мінску — па сем.
«Калі зыходзіць з нашых разлікаў, то на дэбаты па ўсёй Беларусі запатрабуецца 219 гадзін — гэта вельмі шмат з пункту гледжання ўспрымання выбаршчыкам. Усе праблемы будуць вырашацца ў працэсе. Не выключана, што ў гэтую пастанову з часам будуць унесены змяненні», — сказала кіраўнік ЦВК.
Паводле яе слоў, у дэбатах кандыдаты змогуць баць удзел як асабіста, так і накіроўваць на іх сваіх памочнікаў.
Аб’ём праграмы не павінен перавышаць дзве машынапісныя старонкі, ці чатыры тысячы знакаў.Акрамя таго, кожны кандыдат у дэпутаты атрымае магчымасць бясплатна апублікаваць сваю праграму ў адной з рэспубліканскіх дзяржаўных газет, а таксама ў абласной, гарадской або раённай.
Кандыдатам у дэпутаты таксама будзе дадзена права выступлення па тэлебачанні і радыё. Па тэлебачанні выступленні будуць трансліравацца з 19.00 да 20.00, па радыё — з 18.00 да 19.00.
Парламенцкія выбары ў Беларусі пройдуць 23 верасня.
