07.07.2012 / 08:12

Будслаўскі фэст. Начное шэсце на Краснай плошчы — рэпартаж 8

Дзясяткі тысяч вернікаў розных канфесій у першую суботу ліпеня збіраюцца ў мястэчку ў Мядзельскім раёне, каб ушанаваць абраз Маці Божай Будслаўскай, апякункі Беларусі. Кульмінацыя фэсту — шэсце са свечкамі вакол Краснай плошчы. Яно адбываецца апоўначы, пад спеў малітвы Багародзіцы: «Вітай, Марыя, поўная ласкі! Дабраславёная ты між жанчынамі і дабраславёны плод улоння твайго Езус».

Абраз абносяць вакол плошчы мястэчка, якая носіць рэдкую назву Краснай, што на старабеларускай мове значыла «прыгожай».

2500 пілігрымаў з розных гарадоў краіны прыйшло на фэст пешкі.

Найбольшыя пілігрымкі ішлі сёлета з Мінска (300 чалавек), Баранавіч, Нарачы, Маладзечна.

Імшу ў Будславе адслужыў мітрапаліт Тадэвуш Кандрусевіч. Дарэчы, частку дарогі да Будслава ён адолеў з паломнікамі, у тым ліку на ровары разам з мінскай веласіпеднай пілігрымкай. Суслужылі мітрапаліту іншыя беларускія біскупы.

Гасцямі фэсту былі апостальскі нунцый арцыбіскуп Гуджэроці і біскуп Саратаўскі з Расіі Клеменс Пікель.
«Касцёл у Расіі заўсёды быў меншасцю ў дыяспары. Парафіі знаходзяцца далёка адна ад адной. Людзі перажываюць гэтую адзіноту. Калі ж прыязджаеш сюды, няглядзячы на тое, што і тут здараюцца пэўныя цяжкасці, як і ва ўсім сучасным свеце, вельмі прыемна на душы. Слова прыемна нават не можа перадаць усе пачуцці», — казаў ён.
Раней фэст праходзіў 2 і 3 ліпеня, але ад гэтага года вырашылі ладзіць яго ў першыя выходныя ліпеня.
Сёлета вернікі сабраліся ў Будслаў увечары 6 ліпеня.
Шмат дзе ў Беларусі ў гэту пару адзначаюць Купалле. Густыя дымы і высокія агні суправаджалі запозненых паломнікаў на шляху да санктуарыя.
Асабліва ўражвала ў прыцемку купальскае агнішча над Вілейскім вадасховішчам.

Апошнія перадбудслаўскія кіламетры парадавалі новым асфальтам. Аўтобусны прыпынак у вёсцы Альхоўка, на радзіме паэта Славаміра Адамовіча, — ілюмінаванай каплічкай, якая мігціць уначы. Сам фэст — тым, чым заўжды радуе: атмасферай светліні і неафіцыйнай беларускасцю.

Паралельна з малітвай

пад касцёлам ішоў бойкі гандаль. Аж тры яткі выставіў праваслаўны Свята-Елізавецінскі манастыр, што ў Навінках.

Людзей было на вока меней, чым у мінулыя гады. Хоць хвост традыцыйнай працэсіі па-ранейшаму дасягнуў базілікі, калі ля яе ўжо правілі імшу.

Эмацыйную казань мітрапаліта Кандрусевіча заварожана слухалі ўсе тысячы прысутных.
Статыстычныя лічбы, міжнародныя навіны, а нават анекдоты арганічна ўпляталіся ў прамову аб Марыі, маці Збаўцы.
Ён — нібы падрыхтоўчы перад фэстам-2013, калі будзе адзначацца 400-годдзе знаходжання на беларускай зямлі абраза Маці Божай Будслаўскай.

0
Кастусь Шыталь / Адказаць
07.07.2012 / 08:45
"Пакланіцца абразу" - словазлучэнне тэалагічна няправільнае. Каталікі не пакланяюцца нікому, акрамя Бога. Дзеву Марыю і яе абразы - ушаноўваюць. (Кампендый Катэхізіса КЦ, п. 198 - http://catholic.by/2/libr/docs/docssection/104142.html#33). Папраўце, калі ласка.
0
Глыбоцкі Воўк / Адказаць
07.07.2012 / 08:46
А вось яшчэ адзін рэпартаж: http://westki.info/artykuly/13449/piligrymy-fotarepartazh
0
ок / Адказаць
07.07.2012 / 09:38
у 11 гадзін прамая трансляцыя імшы беларускай
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру