Беларускія баскетбалісткі выйшлі на Еўра! 6

Настассю Верамеенку (№10) сёння было не стрымаць

Цягам месяца наша каманда згуляла восем матчаў у адборачнай групе. Супернікі былі не тое, каб вельмі грозныя, але здольныя папіць крыві — Венгрыя, Ізраіль, Партугалія, Украіна.

Каго не дабралі, дык гэта Алену Леўчанку, якая аддала перавагу жаночай НБА, а не зборнай. Плюс Наталля Марчанка вырашыла развітацца з кар’ерай гульца. Вельмі недарэчнай была яшчэ эпідэмія траўмаў. Каманда пазбавілася многіх лідараў.

Таму той жа Настассі Верамеенкі часам прыходзілася праводзіць на пляцоўцы больш за 35 хвілін.

Цыкл каманда пачала з новым настаўнікам — літоўцам Рымантасам Грыгасам. Ён замяніў Анатоля Буяльскага, які прыводзіў нашу зборную да «бронзы» на Еўра і чацвёртага месца на чэмпіянаце свету.

У гэтым адборы ўсе хатнія гульні беларускі выйгралі. А вось на выездзе двойчы саступілі — венгеркам і ізраільцянкам. Асабліва крыўдным было другое паражэння, усяго два пункты. Тым больш, што шанцаў для перамогі было больш чым дастаткова.

Вырашальнай для нашых стала хатняя гульня з Украінай, якая таксама працягвала змагацца за запаветную пуцёўку.

У прынцыпе, нашы дзяўчаты кантралявалі ход паядынка, хаця ў трэцяй чвэрці крыху давялося пахвалявацца. Занадта сумбурнай яна атрымалася ў выканананні нашай каманды.

Выніковы лік — 68:60. Беларусь перамагла. Самымі выніковымі былі Верамеенка — 20 пунктаў, Ануфрыенка — 16.

Такім чынам нашы баскетбалісткі выйшлі на Еўра-2012, што пройдзе налета ў Францыі.

Жаночая баскетбольная зборная — самая паспяховая беларуская каманда ў гульнявых відах спорту.

ЗП

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ