Актывісты салігорскай філіі Маладога Фронту атрымалі адказ райвыканкаму на свае прапановы, датычныя моўнага пытаньня. Моладзь зьбірала подпісы пад зваротам да райвыканкаму з заклікам правесьці шэраг культурных мерапрыемстваў дзеля папулярызацыі беларускай мовы.
Моладзевы актывіст Аляксей Валабуеў сказаў у размове з намі, што калі моладзь прыйшла да старшыні салігорскага выканаўчага камітэту Аляксандра Рымашэўскага з гэтымі прапановамі, між іншым, агучваньня прыпынкаў у транспарце па‑беларуску й правядзеньня ток‑шоў на тэлевізіі, прысьвечанага моўнаму пытаньню, прадстаўнік уладаў успрыняў гэта як жарт.
А.Валабуеў: Было пэўнае непаразуменьне. Рымашэўскі ўвогуле нас не зразумеў. Сказаў, каб не займаліся бязглузьдзіцай. Лепш ехалі б у калгас, дапамагалі кароў даіць. Але, відаць, ён некаму даручыў гэта, і адказ быў даволі адэкватны. Наконт агучваньня прыпынкаў па‑беларуску было напісана, што рэкамэндавана аўтапарку, каб агучвалі на дзьвюх мовах. Але гэта толькі рэкамэндацыі, таму мы будзем яшчэ зьвяртацца ў аўтапарк па гэтым пытаньні.
На думку Тацьцяны Трафінчык з Таварыства беларускай мовы, калі гэта нават і невялікая перамога, то ўсё ж такі важны досьвед для маладых людзей.
Т.Трафінчык: Гэта была б перамога ў сэнсе, што паставілі мэту й яе дасягнулі. У прынцыпе, можа гэтая справа й ня мае вялікага значэньня для грамадзтва, але для іх саміх яна была б перамогай. Важна, каб атрымаць досьвед, умець дзейнічаць у такой сытуацыі й праяўляць грамадзкую ініцыятуву.
Па іншых прапановах актывісты таксама не атрымалі пазытыўнага й адназначнага адказу.
А.Валабуеў: У правядзеньні на тэлеканале СТК праграмы, прысьвечанай тэме мовы, нам катэгарычна адмовілі, быццам бы па тэхнічных прычынах. На тэлевізіі гэта было б больш галосна, а ў нас галоснасьці ня любяць. Але ўсё ж такі, калі б была магчымасьць правесьці такую праграму, мы запрасілі б прадстаўнікоў мясцовай суполкі ТБМ, і прадстаўнікоў улады, з аддзелу адукацыі ці ідэалёгіі... Мы б запыталі іх аб роўнасьці беларускай і расейскай мовы. Нягледзячы на дзьве дзяржаўныя мовы, беларуская ў нас знаходзіцца ў больш прыніжаным становішчы. Мала заканадзаўчых актаў, як мясцовых уладаў, так і рэспубліканскіх, мае свой варыянт на беларускай мове.
А што Вам адказалі на іншыя прапановы?
А.Валабуеў: Наконт конкурсаў і артыкулаў у мясцовай прэсе, прысьвечаных беларускай мове, нам сказалі неканкрэтна. Маўляў, у гарвыканкаме ёсьць свае пляны, таму яны ўлічаць нашыя прапановы, але як канкрэтна, і да якіх датаў, ці гэтыя мерапрыемствы прамеркаваныя да 125‑годзьдзя з дня нараджэньня Якуба Коласа й Янкі Купалы — невядома. Таму мы будзем удакладняць гэтае пытаньне.
Па меркаваньні галоўнага рэдактара «Нашай Нівы» Андрэя Скурко, такія акцыі вельмі патрэбныя беларускаму грамадзтву, і нездарма ў іх ангажуюцца перш за ўсё маладыя людзі, якая вырасьлі ў незалежнай Беларусі.
А.Скурко: Гэта цудоўная акцыя. У Салігорску расьце грамадзянская супольнасьць Беларусі. Яна падае ўжо свой голас. Ёй неабыякавы лёс мовы й выгляд таго гораду, у якім яна жыве. Гэта людзі, якія ўжо ня памятаюць Савецкага Саюзу, яны вырасьлі ў незалежнай Беларусі. У якую б школу яны не хадзілі, нягледзячы на ўсе перашкоды, якія перажывае цяпер наша нацыянальная адукацыя — вядома, што ў школах і беларуская мова ня вельмі каціруецца, і зь гісторыяй дзіўныя рэчы адбываюцца — але гэтае пакаленьне ўсё ж такі хадзіла ў нацыянальную школу, жыве ў нацыянальнай дзяржаве ўсё сваё сьвядомае жыцьцё, і зразумела, што яно будзе розьніцца ад ранейшых пакаленьняў.
Актывісты Маладога Фронту сабралі пад сваімі прапановамі да старшыні рыйвыканкаму амаль 1800 подпісаў падтрымкі.
У застаўцы выкарыстаны плякат Уладзімера Крукоўскага
