У Мінску затрыманая яшчэ адна актывістка антыядзернай кампаніі 2

У Мінску затрыманая яшчэ адна актывістка беларускай антыядзернай кампаніі, старшыня грамадскага аб’яднання «Экадом» Ірына Сухій.

СМС-паведамленне пра сваё затрыманне Сухій прыслала журналістам, якія чакалі яе каля будынка расійскага пасольства ў Мінску.

Як паведамлялася, сёння ў 12.00 актывісты-эколагі планавалі перадаць у пасольства РФ адкрыты зварот супраць падпісання генеральнага кантракта на будаўніцтва беларускай АЭС.

Генкантракт павінен быць падпісаны сёння ў рамках візіту ў Мінск прэм’ер-міністра РФ Дзмітрыя Мядзведзева.

За некалькі гадзін таму ў Мінску затрымалі яшчэ двух актывістаў, каардынатара кампаніі Таццяну Новікаву і расійскага фізіка-ядзершчыка Андрэя Ажароўскага. Разам з Ірынай Сухій яны мелі намер наведаць пасольства. Пасля інфармацыі пра іх затрыманне Сухій вырашыла адправіць зварот у пасольства па факсе, а затым — падысці да расійскага дыппрадстаўніцтва, каб даць каментар журналістам, але таксама была затрыманая.

Падрабязнасці затрымання невядомыя. Пакуль ёсць інфармацыя толькі аб тым, што Новікава і Ажароўскі знаходзяцца ў Ленінскім РУУС.

Не выключана, што затрыманым інкрымінуюць арганізацыю несанкцыянаванай акцыі, якую правяла напярэдадні на месцы будучай беларускай АЭС група маладых людзей. Удзельнікі ўчарашняй акцыі разгарнулі транспаранты са словамі «Крыем матам ваш Расатам» і «Нас не спыталі!». На фоне інфармацыйнага стэнда і збудаванняў інфраструктуры беларускай АЭС з’явілася сімвалічная ядзерная Смерць з рыдлёўкай і плакатам «Будуеце АЭС? Тады я іду да Вас».

Трэба адзначыць, што незадоўга да прызначанага часу перадачы ў пасольства РФ адкрытага звароту каля будынка дыппрадстаўніцтва дзяжурылі супрацоўнікі спецслужб у цывільным.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ