28.07.2012 / 10:54

Прадавец Камароўкі: 110 000 рублеў за ялавічыну? Гэта яшчэ танна 7

Колькі што каштуе на Камароўцы.

Праходжу каля мясных прылаўкаў на крытай частцы Камароўскага рынка — ўсё, чаго душа пажадае: свініна, ялавічына, цяляціна, бараніна. Засоленае сала з мяснымі праслойкамі з часнаком, каляндрай і кропам. Пахне так, што слінка цячэ!

Прадаўшчыцы адна за адной прапануюць мне мяса, сала, выразкі, рабрынкі, шыю і кумпякі і наперабой запрашаюць купіць што-небудзь:

«Вось ялавічына! З гэтага вы зробіце адбіўную, можна запекчы, вось храсткі, лапатка — усё мяккае!», — рэкламуе сваю прадукцыю на ўсе лады гандлярка.

Другая перахоплівае маю ўвагу: «Вось свініна! Салка-мяска — усе з вёскі, гляньце! Свойскае ідзе! Вы яе перакруціце — і ўсе будзе. Яна з больш сакавітая за ялавічыну, не параўнаць», — гаворыць мне ўжо ў здагонку прадавачка.

Уцякаю не дарма! Пужаюць кошты на гэтае цудоўнае мяса!

«Вось ялавічынка — за 85, вось кавалачак за 110! Штосьці горай, з пражылачкамі — 85!» — ахвотна агучваюць кошты прадаўцы. — Трошкі горай — і 85 тысяч рублёў?

Прыглядаюся да коштаў. Кілаграм свініны на «Камароўцы» каштуе ў сярэднім 50–70 тысяч рублёў, ялавічына — ад 80 да 130 тысячаў, а кілаграмовы кавалачак тлустай бараніны можна купіць за 110 тысяч рублёў!
Даражэй — цяляціна: кілаграм найдалікатнага кумпячка — 155 тысяч рублёў.

Нягледзячы на такія кошты, прадаўцы заўважаюць, што недахопу пакупнікоў яны не адчуваюць.

«Пакупніцкая здольнасць не зменшылася. Хто купляў — той купляе і зараз. Людзі на шмотцы зэканомяць, але купляюць. Хто прывык есці, той купляе, хто прывык эканоміць…
Гляньце кошты ў „Кароне“! Там ялавічына па 176 тысячаў за кілаграм. Да нас пакупнікі прыходзяць і робяць вялікія вочы, бо ў нас яшчэ танна!» — канчаткова дабівае мяне прадаўшчыца.

Дарэчы, кошты ў той самай «Кароне» і праўда такія: «Ялавічына — 170 000 рублёў, свініна — 74 000 рублёў».

Пэўна, я чаго не разумею, бо не лічу, што 120 ці 170 тысячаў за кілаграм — гэта нармальныя кошты і ніхто, акрамя мяне, на рынку ім не здзіўляецца!

«Салодкае жыццё» для фанатаў таксама каштуе дорага. Цукеркі на кірмашы — не танней за 35–40 тысячаў. А самыя дарагія — 145 000 за кілаграм. Вельмі сімвалічна цукеркі называюцца «Натхненне»!

Прыкладна ў столькі ж, колькі каштуе ялавічына, на рынку ў канец сезона абыдзецца вядро клубніцаў — 120 000 рублёў.

Пасля «мясных» уражанняў шукаю прадукты па чалавечых цэнах. У параўнанні з пачаткам ліпеня многія прадукты ўжо патаннелі. Агуркі, памідоры, капуста — цана за кілаграм таго ці іншага вагаецца на ўзроўні 5–8 тысячаў.
Маладзенькія кабачкі і баклажаны на рынку таксама капейкі — да 5 тысячаў рублёў. Дарэчы, бульба ўжо каштуе 2800 за кілаграм.

Цэны на кроп, пятрушку, часнок, салату і чарніцы трымаюцца на ўзроўні пачатку месяца. За кілаграм чарніцаў трэба аддаць 30–35 тысячаў рублёў, за пучок кропу і пятрушкі — 6 тысячаў, часнок у бабулек па-ранейшаму па 3 тысячы за адну галоўку

0
Марк / Адказаць
28.07.2012 / 11:12
Мы жывем лепш за ўсіх, а ў тым, што ў нас высокія цэны -- вінаватыя палякі
0
Алёша / Адказаць
28.07.2012 / 13:08
кошт ялавічыны ў Лёндане, адным з самых дарагіх гарадоў ў Эўропе 6-8 фунтоў за кг атрымоўваецца 78 - 105 тыс, як ні круці танней чым у Менску)
0
Libertarian / Адказаць
28.07.2012 / 14:00
2Алёша Пан маеш рацыю быў неяк (2009) закупаўся ежаю у Чэчэстэры (на поўдзень ад Лёндана) выйшла на 20% таньней за тыя самыя пакупкі у менскім гіпэрмаркеце.
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру