07.04.2007 / 19:15

Чынавенства бяз органаў 3

Ці памятаеце вы эўразьвязаўскую ўмову №2? Піша ў сваім блогу Аляксандар Класкоўскі.

Рэабілітацыі недзяржаўных пэрыёдыкаў, выкінутых з шапікаў ды каталёгаў перад выбарамі-2006, пакуль што не прадбачыцца. Памятаеце, рэдактары шэрагу такіх выданьняў некалькі разоў пісалі самаму высокаму начальству, каб дапамагло аднавіць статус-кво. Днямі ў Берасьці прагучаў ускосны адказ. Маўляў, нідзе ў сьвеце дзяржава распаўсюдам апазыцыйных мэдыяў не займаецца.

Са свайго боку спыніць уціск прэсы патрабуе Брусэль. Мусіць, многія ўжо і пазабывалі тыя лістападаўскія 12 умоваў Эўразьвязу. Нагадаю ўмову №2: "Паважаць права народу Беларусі на незалежную інфармацыю і свабоду слова, напрыклад, свабода журналістам працаваць без прыгнёту або судовага перасьледу, каб не зачыняліся газэты і не было перашкодаў іх распаўсюду".

Беларускае кіраўніцтва закідае Захаду падвойныя стандарты. Дык можа, каб адчапіўся, узяць ды скапіяваць ягоныя ўласныя стандарты ў галіне СМІ? :)

...Памятаю, як, упершыню трапіўшы ў Францыю ў сярэдзіне 90-х, папрасіў тамтэйшых калегаў: ну пакажэце хоць адзін дзяржаўны пэрыёдык! Яны доўга корпаліся ў стосах і нарэшце выцягнулі бюлетэнь фармату А4 (як цяперашняя "НН":). Здаецца, пад назваю "Lettre de Matignon" (іхні Матыньёнскі палац — аналяг нашага Дому ўраду).

Я пагартаў. Ніякай прапаганды, толькі афіцыйная хроніка ды пераказ урадавых пастаноў. Лічы, дайджэст. Падручны матэрыял для журналістаў ды юрыстаў.

— І гэта ўсё?

— Усё! — адказалі французы.

Нашай кіроўнай эліце такое можа хіба ў благім сьне прымроіцца. А там, у заходніх дэмакратыях, гэта звыклая норма, што не заўважаецца, як дыханьне: фактычна ўся прэса — недзяржаўная. Кажучы мовай нашага чынавенства — уся апазыцыйная.

Во жах: начальства — бяз органаў! :)

І пры гэтым дзяржава ня толькі гарантуе распаўсюд пэрыёдыкаў незалежна ад палітычнага кірунку (гэта норма, напрыклад, закладзена ў францускім законе 1947 году), але яшчэ і датацыі пошце вылучае, каб падпіска абыходзілася таньней. У Францыі на гэта асыгнуюцца штогод сотні мільёнаў эўра. Зь невялікімі варыяцыямі падобныя прынцыпы распаўсюду прэсы дзейнічаюць і ў іншых сталых дэмакратыях.

Дзеля чаго марнуюцца казённыя сродкі? Нашыя функцыянэры будуць доўга сьмяяцца з замежных дзівакоў. Усё гэта робіцца там дзеля забесьпячэньня канстытуцыйнага права грамадзянаў на свабоднае атрыманьне інфармацыі.

Ну як ты знойдзеш агульную мову з такімі марсыянамі? :)

Зрэшты, ня выключана, што на пэўным этапе гандлю з Эўразьвязам афіцыйны Менск згодзіцца вярнуць у шапікі колькі там рэпрэсаваных выданьняў. І гэтае аднаўленьне статус-кво пададуць як калясальны зрух у бок дэмакратызацыі.

Падобным чынам, дарэчы, можа выглядаць і сытуацыя з палітвязьнямі. Спачатку ідзе паласа пасадак, а потым кагосьці амністуюць — вось вам нібыта і саступка.

Разьлічваць на большае Эўразьвязу, ва ўсякім разе пры сёньняшніх падыходах, пакуль што не выпадае. Не настолькі слаба пачуваецца тутэйшая ўлада.

Яшчэ болей, пэўныя крыніцы сьцьвярджаюць: у Брусэлі зноў мацнеюць размовы пра тое, што найлепей аддаць "беларускае пытаньне" на водкуп Маскве. Калі насамрэч так, то, мусіць, старой Эўропе па-ранейшаму найзручней быць "трошачкі цяжарнай" гэтым самым пытаньнем.

Ну а Масква, канешне, вырашыць яго можа. Ды так, што мала ня здасца.

Аляксандар КЛАСКОЎСКІ.

0
[+] / Адказаць
07.04.2007 / 19:27
Працягваем мармытаць сабе пад нос.
0
Кнехт / Адказаць
07.04.2007 / 20:28
Спадар Класкоўскі напэўна запамятаваў, што Лукашэнка быў з візітам у Францыю, па прыездзе з якога адзначыў, што " мы заклалі ў сваю новую рэдакцыю Канстытуцыі ўсё самае лепшае, што ёсць у французскай канстытуцыі". Таму Вашыя спасылкі на парадкі ў Францыі запозненыя. Беларускі народ павінен думаць, што гэта французы парушаюць сваю канстытуцыю, даючы такі шалёны перакос у суадносінах дзяржаўнай і недзяржаўнай прэсы на карысць апошняй. З гэтага вынікае, што французскія "класкоўскія" павінны тэрмінова праязджаць у Беларусь, каб перахапіць агеньчык іх канстытуцыі, які яркім полымям засіяў у нашых палесцінах.
0
Аляксандар КЛАСКОЎСКІ to Кнехт / Адказаць
07.04.2007 / 20:44
Ва ўсякім разе, тыдзень таму пра гэты візыт я яшчэ памятаў :) Бо напісаў пра яго артыкул "Гэта будзе прарыў на восі Масква -- Менск -- Парыж": http://www.nn.by/index.php?c=ar&i=7708 Калі ж сур'ёзна, дык вы цалкам маеце рацыю: публічныя адлупы Эўропе -- гэта піяр, разьлічаны на неабазнаны пласт айчыннага электарату. На жаль, пласт немалы. У гэтых простых людзей застаецца агульнае ўражаньне: заходнікі чапляюцца, накідаюць абсурдныя патрабаваньні!
Каб пакінуць каментар, калі ласка, актывуйце JavaScript у наладах свайго браўзеру