Суд Кастрычніцкага раёна Мінска абвінаваціў затрыманага 30 жніўня ў сталіцы Паўла Еўціхіева ў дробным хуліганстве і прыгаварыў яго да пяці сутак арышту, паведамляе праваабарончы сайт www.spring96.org.

Еўціхіеў, Раман Пратасевіч, Андрэй Ткачоў і яшчэ некалькі адміністратараў апазіцыйных супольнасцяў у сацыяльных сетках былі затрыманы 30 жніўня у Мінску людзьмі ў цывільным.

Паводле інфармацыі праваабаронцаў, затрыманага супрацоўнікамі КДБ Рамана Пратасевіча пасля допыту, пагроз і збівання адпусцілі праз чатыры гадзіны, бо ён непаўналетні.

Ператрус адбыўся на кватэры дзяўчыны Андрэя Ткачова. Канфіскаваны ноўтбук, а самога маладога чалавека забралі супрацоўнікі міліцыі на допыт. Праваабаронцы не выключаюць, што ён таксама арыштаваны.

Cяргею Бяспалаву, якога папярэдзілі сябры, удалося пазбегчы затрымання. Яго месцазнаходжанне невядомае.

Таксама стала вядома, што 30 жніўня ў Віцебску быў затрыманы мадэратар інтэрнэт-суполкі «Надакучыў нам гэты Лукашэнка» Алег Шрамук. У дзверы яго кватэры пазваніла невядомая жанчына і прапанавала набыць атруту для мышэй. Гаспадары кватэры адмовіліся ад прапановы, але праз некаторы час гэтая ж жанчына пазваніла зноў. Калі Алег адчыніў дзверы, у кватэру ўварваліся супрацоўнікі спецназу і міліцыі. Без тлумачэння прычын яны затрымалі Шрамука, сказаўшы, што з’яўляюцца супрацоўнікамі Кастрычніцкага РАУС. Дапыталі таксама і Алесю Шрамук.

Пазней стала вядома, што Шрамук з райаддзела дастаўлены ў Інспекцыю выканання пакаранняў, пасля допыту яго адпусцілі.

Акрамя таго, невядомыя ўзламалі блог апазіцыйнага палітыка Віктара Івашкевіча на сайце «Беларускі партызан» і апублікавалі ад яго імя тэкст са знявагамі ў бок журналісткі Ірыны Халіп.

Праваабаронца Валянцін Стэфановіч лічыць, што затрыманні адміністратараў суполак vKontakte — гэта «чарговыя пазапраўныя, прэвентыўныя адвольныя затрыманні». «Я мяркую, што гэта звязана з заклікамі да байкоту выбараў. Бачна, што ўлады вельмі хваравіта рэагуюць на гэтыя ініцыятывы. Самі па сабе заклікі да байкоту не забароненыя дзейным заканадаўствам. Але мы бачым такія абсалютна непрапарцыйныя захады ўладаў. Вось гэтая спецаперацыя КДБ адносна сацыяльных сетак можа быць звязаная ў тым ліку і з байкотам», — адзначыў ён.

Хочаш падзяліцца важнай інфармацыяй ананімна і канфідэнцыйна?