16.09.2012 / 18:59

Тайбаксёр Гуркоў у знак пратэсту адмовіўся ад медаля чэмпіянату свету — відэа 7

Незадаволены судзейскім рашэннем, Віталь Гуркоў байкатаваў цырымонію ўзнагароджвання.

Віталь Гуркоў.

У фінальным двубоі чэмпіянату свету па тайскім боксе, што прайшоў у расійскім Санкт-Пецярбургу, суддзі спрэчна аддалі перамогу мясцоваму байцу, паведамляе «Еўрарадыё».

Гэта рашэнне выклікала хвалю дыскусій. Паводле правілаў тайскага боксу, дзе цэняцца ўдары локцямі і клінч, на думку многіх, перамог беларус Віталь Гуркоў. Расіянін не глядзеўся мяшком, узяў трэці раўнд і нават перабіў нашага байца нагамі, але такога для перамогі ў гэтым відзе спорту зазвычай недастаткова.

Віталь Гуркоў, які лічыцца байцом высакародным і інтэлігентным, у знак пратэсту адмовіўся выходзіць на п’едэстал і забіраць срэбны медаль.

«Я ўчора папрасіў падаць пратэст. Там лік 3:2 па судзейскіх нататках. Але там яшчэ нейкія кантрольныя нататкі. Яны таксама — у расійскі бок, — кажа трэнер Віталя Дзмітрый Пясецкі. — Карацей, аказалася, што няма прэцэдэнту, каб падаць пратэст».

Двубой Гуркоў-Магамедаў па сутнасці вырашаў барацьбу за другое месца ў камандным заліку. Першае месца заняла зборная Тайланда. У паўфінале, дарэчы, беларус сенсацыйна перамог сусветную зорку прафесійнага тайскага бокса Кема. Здавалася б, праблемаў з Магамедавым быць не можа. Але ў справу, на думку Дзмітрыя Пясецкага, умяшалася спартовая палітыка.

«Яны ж хітра зрабілі. Там, напрыклад, адзін з бакавых суддзяў быў Балаш, — працягвае Дзмітрый Пясецкі. — Гэта венгр, і вельмі талковы суддзя. Але ён ужо тры гады жыве ў Маскве і трэніруе ў іх клубе. Зразумела, што пры такім раскладзе ён будзе аддаваць у іншы бок.
Загадзя ведаючы, што можа быць роўны бой, падабралі адпаведную судзейскую брыгаду».

Апошнім часам, на думку беларускіх спецыялістаў, нашым даводзіцца змагацца не толькі з моцнымі сапернікамі, якіх няпроста накаўтаваць, але і з суддзямі.

Так было, напрыклад, з баксёрам Сяргеем Карнеевым, якому не аддалі перамогу на Алімпіядзе ў Лондане ў супрацьстаянні з азербайджанцам. Канстанцін Маханькоў, настаўнік Карнеева, трэніраваў і тайбаксёра Віталя Гуркова, якому ставіў тэхніку рук і выводзіў на пік формы.

Канстанцін Маханькоў: «З судзействам было не ўсё добра. Віталь выйграў бой, але аддалі ў іншы бок. Трэба было гэтага і чакаць. У Расіі з расіянінам трэба перамагаць больш відавочна. Каментатар таксама выказаўся, што перамог Гуркоў, але наракаць на судзейскае рашэнне не ўзяўся».

Еўрарадыё: Выходзіць, што такое ў супрацьстаянні з багатымі краінамі будзе працягвацца. Нашых будуць і далей засуджваць у боксе і тайскім боксе …

Канстанцін Маханькоў: «Заўсёды так было, але калі цябе гэта не тычыцца, ты думаеш, што ўсё добра. Трэба пісаць пра гэта, трэба гаварыць. Тое, у што пераўтварыўся, напрыклад, алімпійскі бокс, то ўвогуле няма чаго абмяркоўваць: на Гульнях у Лондане было 24 пратэсты, і толькі два былі задаволеныя. Трэба рабіць высновы і працаваць над тактыкай. Апускаць рукі ці ісці пад краму піць піва — гэта таксама не выйсце ў такой сітуацыі».

На чэмпіянаце свету ў Санкт-Пецярбургу беларусы ўсё ж здабылі тры залатыя медалі.
Перамог яшчэ адзін заслужаны беларускі баец Андрэй Кулебін (67 кг), які нечакана расправіўся з топавым тайскім прафесіяналам, а таксама Дзмітрый Валент (75 кг) і Дзяніс Ганчаронак (91 кг). Калі б перамогу аддалі Гуркову, то Беларусь абышла б Расію. А так у нас трэцяе агульнакаманднае месца.

0
Сырок разладу / Адказаць
16.09.2012 / 19:50
Наш Чалавек http://nn.by/?c=ar&i=45198
0
Борис / Адказаць
16.09.2012 / 20:51
Гурков - редкий спортсмен, за которого хочется болеть.
0
мясцовы2 / Адказаць
16.09.2012 / 21:04
тады е...ашыць трэба так, каб праціўнік ужо устаць не мог
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру