Шэсць апазіцыйных структур заклікалі грамадзян не хадзіць на выбары

Шэсць беларускіх апазіцыйных структур выступілі з заклікам да грамадзян не хадзіць на выбарчыя ўчасткі.

Байкатаваць парламенцкія выбары заклікалі

Аб’яднаная грамадзянская партыя (АГП), зарэгістраваная ў Чэхіі міжнародная арганізацыя «Малады фронт», аргкамітэты па стварэнні партыі «Беларуская хрысціянская дэмакратыя» (БХД) і «Беларускі рух», Беларускі незалежны прафсаюз работнікаў радыёэлектроннай прамысловасці і Рада беларускай інтэлігенцыі.

Як патлумачыў 21 верасня на прэс-канферэнцыі ў Мінску лідар АГП Анатоль Лябедзька, заклік адрасаваны тым, хто яшчэ не вызначыўся з нагоды галасавання. «Мы заклікаем іх 23 верасня не ўдзельнічаць у фарсе. У іх ёсць альтэрнатыва — з’ездзіць да сваіх бацькоў у вёску, схадзіць у лес у грыбы, падыхаць паветрам, схадзіць на рыбалку. Гэта агульнае наша пасланне, пасланне тых суб’ектаў, якія так ці інакш разам працавалі падчас выбарчай кампаніі «, — адзначыў палітык.

Сустаршыня аргкамітэта па стварэнні БХД Віталь Рымашэўскі заявіў: галоўным крытэрыем пры ацэнцы выбараў па-ранейшаму застаецца наяўнасць у краіне палітзняволеных і адміністрацыйныя арышты актывістаў кампаніі байкоту.

«Мы лічым, што ізаляцыя асноўных апанентаў рэжыму ад удзелу ў выбарчым працэсе — толькі гэта дазваляе прызнаць выбары незаконнымі», — падкрэсліў Рымашэўскі.

Намеснік старшыні «Маладога фронту» Мікалай Дземідзенка не змог прысутнічаць на прэс-канферэнцыі, бо хаваецца ад супрацоўнікаў сілавых структур, якія выказваюць павышаную ўвагу да яго персоны.

Дземідзенка перадаў сваю заяву іншым удзельнікам сустрэчы з журналістамі. У ёй сказана: «Паводле ўжо даўняй традыцыі перад выбарамі пачынаецца ізаляцыя маладзёжных актывістаў. Маладафронтавец Зміцер Крамянецкі ўжо за кратамі, спрабуюць ізаляваць і іншых членаў „Маладога фронту“. Чаго баіцца Лукашэнка? Адказу няма, гэта проста хвароба. Удзельнічаць у гэтых выбарах могуць толькі людзі з яўнымі праблемамі або ў стане афекту. Байкот быў і застаецца адзіным правільным рашэннем».

Палітыкі на прэс-канферэнцыі падкрэслілі: няўдзел у выбарах з’яўляецца такім жа правам грамадзяніна, як і ўдзел у іх.

БелаПАН

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм