22.09.2012 / 13:23

«Прыйшла галасаваць з-за пагроз кіраўніцтва ўніверсітэта выгнаць яе з вучобы» 1

Студэнты прызнаюцца назіральнікам, што прыйшлі на датэрміновае галасаванне пад прымусам.

У чацвёрты дзень датэрміновага галасавання, 21 верасня, назіральнікі працягвалі фіксаваць факты прымусу да галасавання. Асабліва паказальныя факты выявілі назіральнікі праекта «Назіранне за выбарамі: тэорыя і практыка». Як паведаміла каардынатар праекта назірання Анастасія Матчанка,

на ўчастку № 595 107-й Усходняй выбарчай акругі ў Мінску адна са студэнтак Беларускай дзяржаўнай акадэміі мастацтваў заявіла камісіі, што прыйшла галасаваць з-за пагроз кіраўніцтва ўніверсітэта выгнаць яе з вучобы, калі яна не прагаласуе датэрмінова.
На ўчастку № 4 19-й выбарчай акругі ў Віцебску назіральнікі праекта таксама фіксавалі прымушэнне да галасавання з боку куратара групы студэнтаў.

«Участак № 595 107-й Усходняй выбарчай акругі ў Мінску наогул унікальны — там назіральнік Віктар Сенюкевіч ад ГА «Белая Русь» з’яўляецца выкладчыкам політэхнічнага каледжа, у будынку якога знаходзіцца ўчастак.

20 верасня ён пахваліўся камісіі, што загадаў сваім студэнтам прагаласаваць датэрмінова, а 21 верасня — што прасіў іх «прагаласаваць абавязкова», —
паведаміла Матчанка.

Таксама яна адзначыла, што працягваецца тэндэнцыя да завышэння яўкі выбаршчыкаў на ўчастках па ўсёй Беларусі. Участковая камісія № 449 Кальварыйскай выбарчай акругі № 104 за чатыры дні датэрміновага галасавання завысіла яўку амаль утрая. Паводле звестак назіральнікаў, за ўвесь час прагаласаваў 101 чалавек, аднак па пратаколах камісіі — 237. На ўчастку № 6 выбарчай акругі № 13 у Лунінцы (Брэсцкая вобласць) назіральнікі зафіксавалі выдачу 34 бюлетэняў, а па пратаколе камісіі было выдадзена 57 бюлетэняў.

Факты прымусу да галасавання зафіксавалі таксама назіральнікі кампаніі «Праваабаронцы за свабодныя выбары». Паводле іх звестак, на 22% участкаў, за якімі яны назіраюць, быў прымус да галасавання. Адзначаецца і завышэнне яўкі выбаршчыкаў. «

Паводле звестак участковых камісій на ўчастках, дзе вядзецца назіранне, прагаласавала 18.249 чалавек. Паводле звестак назіральнікаў — 16.059 чалавек», —
адзначыў каардынатар кампаніі Валянцін Стэфановіч.

Тую ж тэндэнцыю адзначае і кампанія партыйнага назірання «За справядлівыя выбары». «Напрыклад, у Мінскай-Аўтазаводскай выбарчай акрузе № 92 на ўчастку № 60 галасуюць курсанты Мінскага дзяржаўнага вышэйшага авіяцыйнага каледжа — за чатыры дні прагаласавала каля 35%. Нам расказваюць, што студэнтаў прымушаюць галасаваць датэрмінова куратары груп і адміністрацыя каледжа», — сказаў каардынатар кампаніі назірання Віктар Карняенка.

Акрамя таго, адзначыў ён, улада пачала маніпуляцыі са спісамі выбаршчыкаў. «На выбарчых акругах папярэдне, да пачатку датэрміновага галасавання, называлася агульная колькасць выбаршчыкаў. У пратаколах камісій, якія вывешваюцца пасля кожнага дня датэрміновага галасавання, таксама ёсць графа „колькасць выбаршчыкаў“. Мы палічылі і ўбачылі, што

камісіі заніжаюць колькасць выбаршчыкаў, зарэгістраваных для галасавання.
У сярэднім па краіне колькасць выбаршчыкаў паменшылася на 65 тысяч чалавек — на цэлую выбарчую акругу», — сказаў Карняенка.

0
бязъ дыплёму / Адказаць
22.09.2012 / 18:30
А што тутака казаць - калi навучаешся у дзяржаунай установе,дык чаму не падпарадкоуваешся загадам улады ? Ось калi б за мяжою вучоба была ды яшчэ за свае грошыкi,а вам кажуць iсьцi (у амбасаду альбо тут) галясаваць,тады можна паслаць куды падалей усiх прымусоуцау на выбары. Бо атрымлiваецца,што адначасова хочацца i гоп-гоп,i ца-ца.Але ж вашыя жаданьнi пры iснуючым рэжыме не гумовыя.Хочаце адчуць сябе рэвалюцыянерамi,калi ласка-змагайцеся за свае погляды да апошняга.Вунь студэнты стогадовай даунiны iшлi на катаргу,высылалiся на ускраiны дзяржавы,ужо не кажучы аб выключэньнi з вучобы.Карацей,чытайце гiсторыю. А з разумнай кемлiвасьцю можна i галасуючы нарабiць рэжыму шкоду.Толькi ж дзеля гэтага трэба варушыць галавою,рабiць нестандартныя учынкi,непадпадаючыя пад усялякiя парушэньнi.Яскравы прыклад - Вусаты дзьзядзька,усiх мае, а бальшыня маучыць. I не трэба хвалявацца,усё iдзьзе сваей хадою,паступова,эвалюцыйным шляхам.Так i Сашко некалi казау.Адразу ж маладая расьлiна не дасьць пладоу, i ёй патрэбны гной i вiльгаць. За колькi вякоу у мясцовага люду на генным узроунi выпрацавалася у характары спакойнасьць,цярплiвасьць,памяркоунасьць. Як казау клясык,трэ думаць,думаць i думаць. Перш чым нешта зрабiць.
Каб пакінуць каментар, калі ласка, актывуйце JavaScript у наладах свайго браўзеру