Неяк сустрэў у гарадзкім аўтобусе аднаго баранавіцкага сьвятара. Завязалася гамонка. Тую гутарку перарвала абвестка назвы прыпынка. Дзякаваць Богу (і мясцовым патрыётам, якія пісалі й пісалі лісты аўтапарку) ужо колькі месяцаў у большасьці баранавіцкіх аўтобусаў абвесткі гучаць па-беларуску. А між імі, каб пасажыры не сумавалі, увесь час гучыць “сацыяльная рэкляма”, таксама па-наску.
Праз пару хвілін праслухоўваньня, сьвятар заўважыў:
— Колькі ўжо можна папярэджваць?
Сапраўды, пакуль мы праехалі некалькі прыпынкаў, нас папярэдзілі аб адказнасьці за бязьбілетны праезд і наступтвы — трапляньне ў агульнарэспубліканскую базу дадзеных аб адміністрацыйных правапарушэньнях. Потым узгадалі кішэньнікаў і адказнасьць за выраб, карыстаньне, набыцьцё падробленых квіткоў ці праязных. Нават засьцераглі, што проста неінфармаваньне патрэбных органаў пра падробкі зьяўляецца спрыяньнем злачыннаму ўчынку.
Мы жывём у краіне, дзе нас увесь час папярэджваюць. Паўсюль і пра ўсё. Дастаткова ўключыць тэлевізар, як на цябе абрынуцца напаміны пра адказнасьць й небясьпеку.
Насі флікеры, выключай своечасова газ, заклейвай вокны, выключай сьвятло, ня пі з чужымі, ня едзь за граніцу, ня станься рабом альбо адмарозкам, падключы ў кватэры пажарны апвяшчальнік. У газэтах папярэджваюць пра няўдзел у акцыях апазыцыі, амэрыканскую агрэсію, расейскі капіталізм і прыбалтыйскую бядоту.
Папярэджвае Лукашэнка, засьцерагаюць міністры й чыноўнікі, заахвочваюць да выкананьня сваіх абавязкаў і закону супрацоўнікі дзяржаўных установаў.
Падаецца, што наверсе не даюць веры, што народ можа самастойна нешта рабіць. Альбо ня хочуць…
Інфармаваньне па-беларуску ператварылася ў суцэльную засьцярогу. Электарат адвучваецца думаць пра сябе. Навошта, калі пра цябе клапоціцца дзяржава, усё зробіць, а дзе трэба, папярэдзіць?
Час і эфір у нас скарыстоўваюцца не бізнэсоўцамі, а чыноўнікамі…
Згадалася паездка цягніком. У радыё круцілі папсу, спадарожніца, жанчына зь Пецярбургу, слухала, наразаючы кілбаскі. Раптам паміж сьпевамі пасажыраў пачалі папярэджваць пра небясьпечныя хваробы, якія могуць прычапіцца да пасажыра ў часе паездкі. СНІД, шаленства ды халеру з крываўкай. Кожную дакладна апісвалі: праявы, крыніцы заражэньня, чым лячыцца й наступствы нядбайнасьці.
Суседка па купэ пасьля крываўкі згарнула сваю ссабойку. Потым нейкі час глядзела на мяне і запыталася, як я магу пад такое піць піва. Давялося патлумачыць, што звыкся…