18.04.2007 / 09:33

На Віцебшчыне рыхтуюцца да юбілею 1

15 студзеня 2008 году споўніцца 70 гадоў утварэньню Віцебскай вобласьці. Абласныя ўлады ўжо зацьвердзілі пляны сьвяточных мерапрыемстваў.

15 студзеня 2008 году споўніцца 70 гадоў утварэньню Віцебскай вобласьці. Абласныя ўлады ўжо зацьвердзілі пляны сьвяточных мерапрыемстваў.

Менавіта да сьвята адкрыюць шэраг будаўнічых аб’ектаў, сярод якіх водазаборная станцыя ў Лепелі, дзьве шматкватэрныя хаты для дзетак‑сірот ды іхных прыёмных бацькоў у Верхнядзьвінску, будынак цэнтральнай бальніцы ў Гарадку, вучэбныя корпусы сярэдніх школаў у Глыбокім ды Полацку. Напэўна, у гэтыя дні адчыняць і чарговы аграгарадок.

Асаблівую ўвагу віцеблянаў, безумоўна, прыцягне асьвячэньне адбудаванай на старым месцы Сьвята‑Васкрасенскай царквы, грошы на аднаўленьне якой выдзяляліся з абласнога і гарадзкога бюджэтаў, дзяржаўных і прыватных прадпрыемстваў, фірмаў, а таксама зь месьцічаў. Пры гэтым нават не ўлічвалася, да якой веры належыць тая ці іншая асоба. Але тое, што ў цэнтры старажытнага гораду адновіцца адзін з прыгажэйшых помнікаў беларускага дойлідства, ўспрымаецца станоўча.

Ва ўстановах і на прадпрыемствах заплянаваныя выступы чальцоў інфармацыйна‑прапагандысцкіх групаў, ушаноўваньне перадавікоў тых прадпрыемстваў, якія яшчэ працуюць. Школьнікі напішуць адпаведныя сачыненьні, настаўнікі правядуць да гэтай даты тэматычныя ўрокі й выхаваўчыя мерапрыемствы.

У гэтыя дні плянуецца таксама ўсталяваньне памятнага знаку пры ўводзе другой чэргі Цэнтру рамёстваў «Задзьвіньне» і дошкі на адным з будынкаў Віцебскага дзяржаўнага тэхналягічнага ўнівэрсытэту. А ў новым мікрараёне Віцебску адна з вуліцаў атрымае назву 70‑годзьдзя Віцебскай вобласьці.

Алена Грынявіцкая, Польскае радыё для замежжа

0
Рухавік / Адказаць
19.04.2007 / 03:52
Пытнне апазіцыйным лідэрам. Ці будзем замест воблацей ды раенаў карыстацца назвамі ваеводствамі ды паветамі?
Каб пакінуць каментар, калі ласка, актывуйце JavaScript у наладах свайго браўзеру