Гродзенская ДАІ працягвае выкарыстоўваць відэа з рэгістратараў грамадзянскіх аўто для пакарання парушальнікаў, паведамляе сайт ведамства.
Апошні прыклад — праезд на чырвонае святло 24-гадовага кіроўцы BMW, якога штрафавалі 90 разоў. Гэты выпадак зафіксаваў відэарэгістратар спадарожнага аўто, яго кіроўца перадаў відэа ў ДАІ. Кіроўца BMW атрымаў чарговы штраф, піша сайт ДАІ Гродна і Гродзенскай вобласці.
Дарэчы, прыгоды «рэкардсмэна» былі зафіксаваныя на вуліцы Соламавай, дзе 5 кастрычніка гонкі двух прыяцеляў скончыліся трагедыяй — пад коламі аднаго з аўто загінула жанчына.
За апошні месяц гэта трэці выпадак, калі ДАІ Гродна выкарыстала запісы парушэнняў правілаў, выкладзеныя ў інтэрнэце.У верасні ДАІ адрэагавала на паведамленне ў гродзенскім блогу s13 пра кіроўцу «Опеля», які на праспекце Касманаўтаў праехаў на чырвонае святло і толькі цудам не збіў пешаходаў на пераходзе.
У пачатку кастрычніка ў поле зроку рэгістратара трапіла кіроўца «Форда», якая на вуліцы Каліноўскага пайшла на абгон праз суцэльную паласу разметкі і ледзь не сутыкнулася з сустрэчным аўто.
Варта адзначыць, што рэакцыя на практыку выкарыстання такіх запісаў для высвятлення парушальнікаў і іх пакарання выклікае ў аўтааматараў неадназначная. Шмат хто з іх пры абмеркаванні чарговага паведамлення на гэту тэму выказваецца негатыўна на адрас добраахвотных памочнікаў ДАІ.Іх апаненты мяркуюць, што толькі такім чынам можна прывучыць парушальнікаў трымацца правілаў.