Беларускі палітычны ўцякач у Эквадоры Аляксандр Баранкоў, якога эквадорскія ўлады адмовіліся дэпартаваць у Беларусь, якая патрабавала яго выдачы, вырашыў заняцца праваабарончай дзейнасцю, паведамляе эквадорская La Hora.
84 дні, якія правёў у эквадорскай турме былы беларускі вайсковец
Галоўная паплечніца Баранкова ў арганізацыі праекту — ягоная нявеста Мабэль Андрадэ, эквадорка, якая была блізкім сведкам зняволення і працэсу падрыхтоўкі да экстрадыцыі свайго сябра.
Апрача гэтага сваю дапамогу запрапанавалі замежныя праваабарончыя арганізацыі, эквадорскія ўніверсітэты, спецыялісты і людзі добрай волі, якія думаюць над тым, як скіраваць дапамогу ў эквадорскія турмы.
Баранкоў кажа, што замежныя вязні ў эквадорскіх турмах знаходзяцца ў складаным становішчы, на іх часта нажываюцца адвакаты, якія прапануюць свае паслугі, атрымліваюць грошы і больш ніколі не паказваюцца.
«Кожны зняволены мае сваю гісторыю і незалежна ад таго, учынілі яны нейкае злачынства ці не — гэта людзі, якім патрэбны шанец, каб вярнуцца ў грамадзтва, каб не вярнуцца на злачынны шлях і зноў ня трапіць у турму», — кажа беларус, які не атрымаў амаль ніякай дапамогі ад эквадорскіх праваабарончых арганізацыяў.
Менавіта з гэтай прычыны ён вырашыў арганізаваць бясплатныя юрыдычныя кансультацыі для замежных вязняў, якія не маюць свайго адваката, назіранне за судовымі працэсамі, а таксама дапамогу дзецям, пазбаўленым свабоды разам з сваімі маці.
Баранкоў зазначыў, што хоць эквадорскія ўлады і гарантуюць дзяржаўнага адваката тым вязням, якія не ў стане аплаціць паслугі прыватніка, аднак у рэальнасці справы выглядаюць інакш. Часам замежныя вязні да двух гадоў чакаюць за кратамі рашэння аб дэпартацыі, хоць паводле закона гэты тэрмін не можа быць даўжэйшы за два месяцы, і пры гэтым не атрымліваюць ні ад кога ніякай дапамогі.
Цяпер вырашаюцца юрыдычныя пытанні адкрыцця фонда. Першымі запрапанавалі сваю дапамогу студэнты ўнівэрсітэту Святога Францыска ў Кіта.