11.10.2012 / 13:12

Пасольствам Беларусі ў сумежных са Швецыяй краінах даручана аказваць садзеянне беларуска-шведскім кантактам 1

З закрыццём пасольства Беларусі ў Швецыі беларускім дыппрадстаўніцтвам у сумежных краінах даручана аказваць усялякае садзеянне беларуска-шведскім кантактам. Пра гэта паведаміў прэс-сакратар МЗС Беларусі Андрэй Савіных 11 кастрычніка, адказваючы на пытанне аб тым, як ажыццяўляецца ўзаемадзеянне краін па консульскіх пытаннях.

Пасольства Швецыі ў Мінску 30 жніўня поўнасцю спыніла працу. Шведскія дыпламаты пакінулі Беларусь, як таго запатрабавалі беларускія ўлады. Аналагічныя дзеянні былі ажыццёўленыя і беларускім бокам. Указ аб вызваленні ад пасады пасла Беларусі ў Швецыі Андрэя Грынкевіча быў падпісаны Аляксандрам Лукашэнкам 23 жніўня.

«Грамадзяне Швецыі могуць звяртацца ў любыя консульскія ўстановы Беларусі ў сумежных краінах, — паведаміў Савіных. — Для іх таксама адкрыта магчымасць атрымання віз непасрэдна ў аэрапорце, як для грамадзян краін, дзе адсутнічаюць беларускія дыпламатычныя ўстановы».

Паводле яго слоў, «падрабязная інфармацыя пра консульскае абслугоўванне шведскіх грамадзян размешчана на сайце беларускага пасольства ў Швецыі, які працягвае функцыянаваць».

«Мы ведаем, што вялікая колькасць кантактаў рэалізуецца па лініі розных грамадскіх арганізацый, прадпрыемстваў. Нашым пасольствам у сумежных краінах даручана аказваць гэтым кантактам усялякае садзеянне. Але многія кантакты цяпер рэалізуюцца па прамых сувязях», — паведаміў прэс-сакратар.

Беларуска-шведскі канфлікт разгарэўся пасля таго, як 1 жніўня ўлады Беларусі інфармавалі Швецыю пра непрацяг акрэдытацыі паслу Стэфану Эрыксану. Дыпламата абвінавацілі ў дэструктыўнай дзейнасці. У адказ на гэта шведскія ўлады заявілі, што не прымуць новага пасла Беларусі, і рэкамендавалі двум супрацоўнікам беларускага пасольства пакінуць Стакгольм.

8 жніўня МЗС Беларусі абвясціў пра адкліканне ўсіх супрацоўнікаў беларускага пасольства ў Стакгольме і рэкамендаваў шведскаму боку да 30 жніўня адклікаць усіх сваіх дыпламатаў з Мінска.

0
Gutenman / Адказаць
11.10.2012 / 13:52
Nie budzie z Europaj nadzejnych kantaktau, Z-za abrazschalnych lukawaha aktau !
Каб пакінуць каментар, калі ласка, актывуйце JavaScript у наладах свайго браўзеру