Па ацэнках Эўрапейскай Камісіі, на сёньняшні дзень тарыфы на роўмінг на тэрыторыі ЭЗ значна завышаныя. За кароткі званок, зроблены за мяжой, эўрапейцы плоцяць ад 4 да 6 эўра. У некаторых сытуацыях кошт за падобны званок можа нават перавышаць 12 эўра.
У лістападзе 2006 г. Камісія ініцыявала праграму дзеяньняў, накіраваных на зьніжэньне тарыфаў на роўмінг на тэрыторыі ЭЗ. 12 красавіка Камітэт Эўрапейскага Парлямэнту па пытаньнях прамысловасьці, дасьледчыцкай дзейнасьці і энэргетыкі ( ITRE ) падтрымаў прапанову Эўрапейскай Камісіі. Згодна з рашэньнем Камітэта, зь лета гэтага году кошты на роўмінг на тэрыторыі ЭЗ павінны скараціцца на 70%. Максымальныя стаўкі роўмінгу не павінны перавышаць 40 эўрацэнтаў для зыходных званкоў і 15 эўрацэнтаў для ўваходных.
Наступным крокам у гэтым накірунку будзе галасаваньне на пленарным паседжаньні Эўрапейскага Парлямэнта, заплянаванае на сярэдзіну траўня. Канчатковае рашэньне будзе прынятае Парлямэнтам і Радай ЭЗ, у рамках працэдуры сумеснага прыняцьця рашэньняў (co‑decision ).
