Віцэ-прэм'ер Сямашка знаходзіцца з неанансаваным візітам у Азербайджане 7

Дэлегацыя на чале з першым віцэ-прэм’ерам Беларусі Уладзімірам Сямашкам знаходзіцца з візітам у Азербайджане. 30 кастрычніка з прадстаўнікамі Беларусі сустрэўся прэзідэнт Ільхам Аліеў,

паведамляе азербайджанскі інфармацыйны партал www.trend.az. Бакі выказалі задавальненне паспяховым развіццём адносінаў Беларусі і Азербайджана ў розных галінах, у тым ліку ў эканоміцы. Была адзначана значнасць сумеснага праекта, які рэалізуецца на Гянджынскім аўтамабільным заводзе.

У інтэрв’ю www.trend.az Сямашка паведаміў, што да канца года плануецца правесці ў Мінску беларуска-азербайджанскібізнес-форум, на якім будуць абмяркоўвацца інвестыцыйныя праекты ў розных галінах эканомікі.

«Упэўнены, што з улікам дынамікі нашых адносінаў мерапрыемства пройдзе на высокім узроўні. Спадзяюся, што для азербайджанскіх удзельнікаў форум стане добрай магчымасцю азнаёміцца з эканамічным патэнцыялам нашай краіны, дазволіць наладзіць карысныя сувязі ў Беларусі, якія паслужаць пашырэнню дзейнасці азербайджанскіх кампаній за мяжой і умацаванню беларуска-азербайджанскага партнёрства», — сказаў Сямашка.

Ён нагадаў, што ў 2010 годзе падчас візіту Аляксандра Лукашэнкі ў Азербайджан было падпісана пагадненне аб заахвочванні і ўзаемнай абароне інвестыцый, якое дало азербайджанскім інвестарам дадатковыя гарантыі ў Беларусі. «Яшчэ адным важным стымулам для прыходу азербайджанскіх інвестараў у Беларусь стала стварэнне Мытнага саюза Беларусі, Казахстана і Расіі, — адзначыў Сямашка. — Зараз перад інвестарам у Беларусі адкрываецца ёмісты 170-мільённы рынак збыту трох краін, якія мяжуюць адначасова з Еўрапейскім саюзам і Кітаем».

«Мы ўжо адчулі рост зацікаўленасці азербайджанскага капіталу ў працы на тэрыторыі Беларусі», — сказаў першы віцэ-прэм’ер.

Паводле яго слоў, «значную цікавасць азербайджанскіх кампаній выклікаў двухбаковы інвестыцыйны бізнес-форум з удзелам міністра эканомікі Беларусі Мікалая Снапкова, які прайшоў у лютым 2012 года ў Баку». Сямашка таксама паведаміў, што тры азербайджанскія кампаніі зарэгістраваліся ў якасці ўдзельнікаў VII Беларускага інвестыцыйнага форуму, які пройдзе 15–16 лістапада ў Мінску.

Аналітыкі не выключаюць, што візіт Сямашкі ў Азербайджан звязаны з няўдалымі беларуска-расійскімі перамовамі аб умовах пастаўкі нафты ў чацвёртым квартале гэтага года і ў 2013 годзе.

Чарговы раўнд перамоў адбыўся ў канцы мінулага тыдня ў Маскве, дзе Сямашка сустракаўся з віцэ-прэм’ерам РФ Аркадзем Дварковічам. 26 кастрычніка Дварковіч паведаміў, што Расія і Беларусь абмяркоўваюць аб’ёмы паставак нафты ў звязцы з вырашэннем праблемы экспарту беларускім бокам растваральнікаў. Пазней стала вядома, што Масква прапануе Мінску кампенсаваць расійскаму бюджэту страты ад «растваральнага» бізнесу, якія ацэньваюцца прыкладна ў 1,5 млрд. долараў.

Беларускі бок пра ход перамоў не паведамляе.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ