Днямі мяне аблічылі ў супермаркеце: выбілі мне ў чэку перац на суму 35 550 руб., які я не набывала. Памылку я заўважыла толькі на наступны дзень.Праверыць чэк на касе адразу пасля аплаты, як звычайна, не падумала.
З няпэўнай надзеяй даказаць сваю рацыю — а чаму мне павінны верыць — рушыла ў краму. Адміністратарка паведаміла, што няма той прадавачкі, якая мяне разлічвала. А вернецца яна толькі праз два дні.
Так што «мая хата з краю, нічога я не знаю», каціцеся адсюль са сваім чэкам. Я папрасіла кнігу скаргаў.Пасля гэтага жанчына палагоднела і пачала разбірацца ў чэку.
Мне пашанцавала: кілаграм перцу каштаваў у краме 35 550 рублёў, і ў чэку мне выбілі роўна столькі ж.Маларэальна набыць перац такой эталоннай вагі. Высветлілася, што мне яго выбілі замест багета за 4 600 рублёў. Памылка сістэмы, якую прадавачка не заўважыла. Розніцу ў 30 тысяч адразу ж вярнулі. А я ў сваю чаргу не стала настойваць на запісе ў кнізе скаргаў.
Выснова №1: заўсёды правярайце чэк пасля аплаты!
Выснова №2: у выпадках, калі адказныя асобы адмаўляюцца разбірацца, спакойна, але настойліва патрабуйце кнігу скаргаў. Часам дапамагае.
Што рабіць, калі не ўдалося разабрацца на месцы?
Юрыст Беларускага таварыства абароны спажыўцоў прапануе радыкальныя меры. Калі ў чэку выбілі не тое, што вы куплялі, можаце пісаць заяву ў міліцыю. Бо, фактычна, вас абакралі.