Колькі жыву ў Менску, а такой карцінкі 9 Траўня дагэтуль ніколі ня бачыў. Ад самай раніцы Сьвіслач у раёне парку Горкага і Купалаўскага сквэру расьсякалі маторкі з байцамі МНС на борце. Яны былі ў ратавальных камізэльках, а ў некаторых чаўнах былі відаць аквалянгі.
Найбольш запомніўся саліднага выгляду лысаваты чалавек у чорным строі і ў гальштуку, які на водным ровэры курсаваў уздоўж берагу. Ягоных калегаў у чорным было шмат па ўсёй набярэжнай – на іх са зьдзіўленьнем паглядалі рэдкія бегуны ад інфаркту ды ўладальнікі сабакаў, што вывелі сваіх гадаванцаў гуляць.
Асабліва шмат людзей у цывільным – то бок, у аднолькавых чорных куртках, было ў аўтобусах каля будынку тэлебачаньня на Камуністычнай. Сама вуліца была перакрытая для аўтамабільнага руху ад Чырвонай.
І гэта ўсе зразумець яшчэ можна – бясьпека кіраўніка дзяржавы ў спэцслужбаў кожнага дня на першым месцы. Але навошта там стаялі аўтазакі?
Мо, улады чакалі ад сівых вэтэранаў спробаў узяць штурмам АНТ? Ці баяліся бунту расійскамоўнага насельніцтва, як у Таліне?
Са сьвятам, сябры!
