БТ, 21.40
Загнаных коней прыстрэльваюць, ці ня так? (They Shoot Horses, Don't They?)
ЗША, 1969, каляровы, 120 хв.
Рэжысэр: Сідні Полак
Ролі выконваюць: Джэйн Фонда, Гіг Янг, Сьюзан Ёрк, Рэд Батанз, Боні Бедэлія, Брус Дэрн
Жанр: Драма
Прызы: «Оскар» і «Залаты глёбус» актору Гігу Янгу за найлепшую другаплянную ролю, прэмія «Бафта» актрысе Сьюзан Ёрк і шчэ 2 узнагароды й 6 намінацый.
Вялікая дэпрэсія. Малады каўбой і сівы марак, цяжарная жанчына й стомлены фэрмер, цынічная дзяўчына безь мінулага і старая актрыса без прышлага… Усе яны прыехалі на танцавальны маратон у спадзеве атрымаць прыз 1500 даляраў. Яны будуць танчыць да апошняга, як загнаныя коні, на апошнім уздыху, губляючы апошнія сілы й пачуцьцё рэальнасьці.
Але загнаных коней прыстрэльваюць… І ці здольныя пераможцы жыць далей?
Клясычная драма Сідні Полака, якая зрабіла яго рэжысэрам першай велічыні.
Лад, 22.50
Лянцэлёт Азёрны (Lancelot du Lac)
Францыя – Італія, 1974, каляровы, 85 хв.
Рэжысэр: Рабэр Брэсон
Ролі выконваюць: Люк Сайман, Лаўра Кандамінас, Умбэрта Балсан, Уладзімер Антолек-Арэсэк, Патрык Бэрнгард, Чарльз Балсан
Жанр: Гісторыка-прыгодніцкая прыпавесьць
Адзнака: 7 (з 10)
Рэжысэр Рабэр Брэсон – адзін з сама значных кінатворцаў, стваральнік унікальнай і аскетычнай экраннай мовы, якая сьведчыць пра трансцэндэнтнае. Зварот да касьцюмнай легенды нечаканы для рэжысэра, але й гэтае тэатральнае відовішча Брэсон насычае маральным рыгарызмам і рэлігійнай бескампраміснасьцю.
Карціны Брэсона надзвычай рэдкія госьці на тэлеэкранах, а што да «Лянцэлёта Азёрнага», дык ён кепска вядомы нат кінаманам.
Францускія стужкі тэлеканал «Лад» звычайна дубляжуе на беларускую мову.
