«Газпром» выплаціў Беларусі 625 млн. долараў, выкупіўшы такім чынам у ААТ «Белтрансгаз» 12,5% акцый. Пра гэта паведамілі афіцыйныя крыніцы.
Нагадаем, падпісанне дагавора куплі‑продажу акцый «Белтрансгазу» адбылося 18 мая. У гэты ж дзень дагавор быў зарэгістраваны ў Дзяржаўным камітэце па маёмасці Рэспублікі Беларусь. Згодна з дагаворам, Расія павінна была выплаціць згаданую суму на працягу найбліжэйшых 20 працоўных дзён. Грошы «Газпром» пералічыў датэрмінова.
Цяпер, паводле ўмовы дагавора, у 10‑дзённы тэрмін беларускі бок перавядзе 12,5% акцый «Газпрому». Далей на працягу 50 дзён неабходна будзе правесці сход акцыянераў, на якім у склад членаў савета сумеснага прадпрыемства будзе ўведзены прадстаўнік «Газпрома».
Як паведамлялася раней, спачатку беларускі бок меў на мэце аднамомантна атрымаць грошы за 50% акцый ААТ «Белтрансгаз», але паводле жадання «Газпрома» выплата будзе адбывацца паэтапна на працягу найбліжэйшых трох гадоў.
Кошт «Белтрансгазу» ацэнены ў 5 млрд. долараў ЗША. Штогод «Газпром» будзе набываць 12,5% акцый кампаніі. Сродкі ад продажу часткі беларускай газатранспартнай сістэмы пойдуць у бюджэт Беларусі. Расійскі бок уступіць у правы ўласнасці і карпаратыўнага кіравання 1 сакавіка 2010 года, пасля таго як поўнасцю выкупіць 50% акцый «Белтрансгазу».
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню27
Каментары