У менскім кінатэатры «Цэнтральны» зь 7 па 10 чэрвеня праходзіць фэстываль сучаснага швэдзкага кіно, прысьвечаны тэме жыцьця ў глыбінцы. Гэная тэма атрымалася сугучнай беларускаму мастацтву – і стужку Галіны Адамовіч «Мужчынская справа» ўключылі ў фэст – разам са швэдзкаю дакумэнтальнаю карцінай «Так, як тут». Прыходзьце, глядзіце й параўнайце!
7 чэрвеня
Так, як тут (En plats som den har)
Швэцыя, 2006, 43 хв.
Рэжысэры: Андэрс Фэльман, Даніэль Свэрд
Жанр: Дакумэнтальны фільм
Тры мужчыны розных пакаленьняў – жыхары сельскай мясцовасьці Вэрмланда, дзе на квадратны кілямэтар толькі тры чалавекі. Нягледзячы на асьляпляльныя краявіды, героі фільму сумуюць па іншым жыцьці…
Мужчынская справа
Беларусь, 2007, каляровы, 18 хв.
Рэжысэрка: Галіна Адамовіч
Жанр: Дакумэнтальны фільм
Адзнака: 7,5 (з 10)
Адвеку ў Беларусі музыкамі былі мужчыны. Бязь іх не абыходзілася ніводнае вясельле, ніводнае пахаваньне. У фільме – апошнія народныя музыкі беларускага Палесься – трыё «Вярэнька» Столінскай вёскі Стахава…
Карціна – завяршальная частка трылёгіі, распачатай стужкамі «Божа мой» і «Завядзёнка». Фільм «Мужчынская справа», які выклікаў рэзкае раздражненьне Міністэрства культуры (стужцы прысвоілі найніжэйшую катэгорыю) – працінае трагізмам сыходу.
Апошнія народныя музыкі – у эпоху магнітафонаў і радыё.
Вёска сыходзіць. Герой габлюе дзіцячую дамавіну… Бязладна гучыць пахавальны аркестар – а скрыпка на вясельлі ўжо згубіла майстэрства… Але ў душы гучыць сапраўдная музыка, а сьпевы ў храме ўзносяцца да неба.
Сваёй інтанацыяй карціна Адамовіч нагадвае фільм Асьлюка «Мы жывем на краі». Куды сыходзяць колішняе народнае майстэрства, старыя вёсачкі, скрыпкі, зробленыя сваімі рукамі?
Адамовіч ведае: у неба. Там, дзе знаходзіцца вечнасьць.
І кіно здольнае гэтае неба адбіць.
А 18.30 адбудзецца паказ фільму й сустрэча з рэжысэркай Галінай Адамовіч і прадусарам Зьміцерам Плаксам.
8 чэрвеня
Бывай, Фалькэнбэрг (Farval Falkenberg)
Швэцыя – Данія, 2006, каляровы, 88 хв.
Рэжысэр: Еспер Ганслант
Ролі выконваюць: Хольгер Эрыксан, Ён Эрыксан, Ёрген Свэнсан, Дэвід Ёнсан, Еспер Ганслант
Жанр: Драма
Апошняе лета ў мястэчку Фалькенбэрг. Галоўныя героі фільму – пяцёра сяброў дзяцінства, якія сталі юнакамі. Хаця будучыня маячыць на даляглядзе, нікога гэта не турбуе. Стужка пра сяброўства, успаміны й разьвітаньне зь мястэчкам ля мора…
Дэбютная карціна Еспера Ганслата.
Таксама адбудзецца сустрэча з акцёрам Ёнам Эрыксанам і стваральнікам музыкі да фільму Эрыкам Энаксанам.
9 чэрвеня
Чортавы правінцыялы (Masjavlar)
Швэцыя, 2004, каляровы, 98 хв.
Рэжысэрка: Марыя Блум
Ролі выконваюць: Софія Хейлін, Кайса Эрнст, Ан Петрэн, Лаш Г.Арансан
Жанр: Камэдыя
Мія, якая пакінула дом дзеля жыцьця ў вялікім горадзе, вяртаецца ў мястэчка на 70-годзьдзе бацькі. Сьвяткаваньне ў мясцовым клюбе віруе. Тут і ўзгадваюцца старыя канфлікты…
Дэбют Марыі Блум.
10 чэрвеня
Віват, кароль! (Tjenare kungen)
Швэцыя, 2005, каляровы, 90 хв.
Рэжысэр: Ульф Мальмрас
Ролі выконваюць: Ёзэфін Нэльдэн, Сэсылія Валін, Ёханна Стрэмбэрг, Малін Морган, Ёэль Кінаман, Шэл Бэрквіст
Жанр: Камэдыйная мэлядрама
Пасьля таго, як Абрэ ня трапіла на канцэрт, яна пакідае сваё мястэчка і вырашае сама стацца рок-зоркай. Разам з панкам Міліянам яна стварае гурт…
Рэжысэр Ульф Мальмрас атрымліваў шматлікія ўзнагароды за свае стужкі.
А 21.00 – усе сэансы ў перакладзе на беларускую мову, а 18.30 – фільмы на мове арыгіналу з ангельскімі субтытрамі.
