Зь Беларусі за суботу й нядзелю
Папаўся, Жучку, у панскую ручку!
Менскі судзьдзя Савіч за пятніцу разгледзеў позву генэрала Шэймана да газэты «Навіны» й журналіста з «БДГ» Аніські за абразу гонару. Адказчыкі прасілі пра моўную экспэртызу і каб Шэйман паказаў тэхпашпарт на дом, але суд гэта адхіліў. Шэйман некалі быў сябрам ЗБВ, а цяпер яго лічаць меншым беларусажэрам, чым Замяталін ці Ціцянкоў. «Навіны» напісалі, што Шэйман у Падліпках збудаваў хароміну, а аказалася, што гэта нібы не яго дом, а некага іншага, а ягоны побач — малы. Судзьдзя бязь літасьці засудзіў «Навіны» на 10 мільярдаў рублёў кары, а Аніську — на 5 мільярдаў. Павал Жук, заснавальнік «Навінаў», кажа, што месячны даход выданьня — усяго 80 мільёнаў і што цяпер газэта мусіць зачыніцца, а будзе выдавацца новая — «Наша свабода».
Serial Killer у Быхаве
У Быхаве прысудзілі да сьмерці забойцу чатырох кабетаў. Трох зь іх ён у сябе ў дварэ закапаў. Начытаўся дурных газэтаў і называў сябе «санітарам грамадзтва».
25% мае грошы
БелаПАН піша, што НДІ Мінэканомікі апытваў людзей, як яны жывуць. Выявілася, што 46% «ледзьве сточваюць канцы з канцамі», а 7% завінаваціліся грошы, а 9%праядаюць свае ашчаджэньні. Затое 23% удаецца крыху ашчаджаць, а 2% дык і шмат. 13% пабаяліся адказаць на пытаньне. Паводле прафсаюзаў, самае дарагое жыцьцё ў Менску, а тады ў Горадні, самае таннае — у Віцебску, а тады ў Берасьці. Розьніца між Менскам і Віцебскам невялікая: 13% ад менскага «спажывецкага кошыка» (які роўны 10 мільёнам 40 тысячам).
ГЭС на Нёмане
У 10 км ад Горадні пабудуюць ГЭС, плаціна-мост будзе ўвышкі на 9 мэтраў, затопяць пад вадасховішча 300 гектараў зямлі. Будова каштавацьме пад 25 мільёнаў даляраў. Спачатку думалі пабудаваць каскад з 6 ГЭС, а пасьля абдумаліся на дзьвюх: гэтай Гарадзенскай і яшчэ адной, Нёманскай, піша БелаПАН.
Хадзілі разьбірацца
Літоўская паліцыя злавіла ў паўкілямэтры ад мяжы, пад Апікартамі, трох беларускіх міліцыянтаў зь Івейскага раёну, а зь імі дзядка 78 гадоў з Гарадзенскага па прозьвішчы Грынюк. Адзін міліцыянт быў у форме і зь пісталетам, рэшта — зь міліцэйскімі паперамі. Яны быццам бы хадзілі ў Салечніцкі раён разьбірацца, хто скраў карову ў Грынюка. Пасадзілі ў каталажку.
