КГБ у ЗБСе

 

23 верасьня ў офіс Задзіночаньня беларускіх студэнтаў завітаў старшы лейтэнант Камітэту дзяржаўнай бясьпекі Г.Сысой. Напярэдадні ён тэлефанаваў старшыні ЗБС Крысьціне Сідун і настойліва прапаноўваў сустрэцца, каб пазнаёміцца з гэтай студэнцкай арганізацыяй і абмеркаваць нейкія пытаньні. Размова тычылася пікетаў, якія будзе ладзіць ЗБС 27 і 28 верасьня. Пікеты пройдуць пад назвай «Кожнаму студэнту па даху». Мэта гэтых пікетаў — прыцягненьне ўвагі да праблемы з расьсяленьнем студэнтаў па інтэрнатах. Менавіта гэтая актыўнасьць, ніяк не палітычная, напярэдадні акцыяў апазыцыі і выклікала занепакоенасьць органаў дзяржбясьпекі. Размова доўжылася каля 20 хвілінаў. На працягу размовы ст.лейтэнант Г.Сысой задаваў пытаньні аб колькасьці студэнтаў у арганізацыі, аб мерапрыемствах, якія плянуе праводзіць у будучым ЗБС. Са словаў сп.Г.Сысоя, ягонае ведамства вельмі цікавіцца праблемамі студэнтаў, іх вучобай, цяжкасьцямі, якія ўзьнікаюць у стасунках студэнтаў з выкладчыкамі. Таварыш з КГБ прапанаваў Крысьціне Сідун у выпадку ўзьнікненьня нейкіх цяжкасьцяў зьвяртацца па дапамогу да іх у КГБ, і яны абавязкова разьбяруцца з гэтым, дапамогуць студэнтам і з вучобай, і з атрыманьнем інтэрнату, толькі, маўляў, пікеты не выстаўляйце, не актывізуйце студэнцкіх масаў. ЗБСу прыемна: увага!

Студэнт