пазытывы
Паменела пісьменьнікаў з народу
Адным з прадуктаў дзейнасьці дзяржаўнага арганізму ёсьць «просты» альбо «малы» чалавек. Гэтая істота ня толькі залежыць ад улады, але шчыра імкнецца аддаць ёй што мага болей сваіх правоў і абавязкаў, спадзяваньняў і сьлёзаў.
Рамантыкі і ідэалісты па дарозе на барыкады і эшафоты са зьдзіўленьнем і нянавісьцю пазіраюць на пабытовую мітусьню простых малых людзей. Дарэмна зьдзіўляюцца.
Што зробіш, калі гэткім чынам сьвет наш уладкаваны. Ёсьць мізэрныя людзі. І да плябеяў можа прылічыць сябе кожны, хто прызнае існаваньне патрыцыяў. Але ж няма малых пакутаў і людзкіх бедаў, што ня вартыя ўвагі. Калі адзін змагаецца за праўду і веру, тысячы здабываюць кавалак хлеба сваім дзецям. Дэман вайны і любові ніколі не ўкладзе зброі ў іхныя рукі.
Гэта зусім не паэтычна. Але ж і тыя, што ўвесь час размаўляюць прозай, не жалезныя. Ня здольныя змагацца і крычаць, яны скардзяцца, раяць, прапануюць.
У нашай краіне зьбіраюць, разглядаюць, сартуюць і ўлічваюць гэтую пісаніну шматлікія дзяржаўныя ўстановы. Наймагутнейшая зь іх, безумоўна, «Упраўленьне па рабоце са зваротамі грамадзянаў Адміністрацыі Прэзыдэнта Рэспублікі Беларусь». У інфармацыйным бюлетэні памянёнай Адміністрацыі ваш карэспандэнт знайшоў вельмі цікавыя лічбы.
Ніколі б не паверыў, каб сам не палічыў: толькі ў Нацыянальны сход, Адміністрацыю Прэзыдэнта, цэнтральны апарат Камітэту дзяржаўнага кантролю і Савет Міністраў зьвярнуўся за 1999 год кожны 230 грамадзянін Беларусі.
Асноўныя спадзяваньні, безумоўна на Абраньніка — 68% зваротаў, потым на ягоных пільных кантралёраў — 11%, потым на ягоных верных дэпутатаў — 10%, потым на ягоных увішных міністраў — 9% і нарэшце на ягоны Савет Рэспублікі — 2%.
Калі ж лічбы зваротаў па абласьцях параўнаць з улікам насельніцтва паводле апошняга перапісу, атрымліваецца нейкае сэпаратысцкае відовішча: прыхільнасьць заходнікаў да кантактаў з начальствам занадта малая. Асабліва калі параўнаць зь іхнай здольнасьцю ўладкоўвацца ў жыцьці.
Звароты грамадзянаў у найвышэйшыя органы дзяржаўнай улады кіраваньня ў 1999 г. па абласьцях
Зваротаў у разьліку на 100 тыс.жыхароў Берасьцейская 262
Гарадзенская 266
Віцебская 320
Магілёўская 419
Менская 420
Гомельская 433
Менск 666
А цяпер пазытыў. Проці 1998 году колькасьць зваротаў скарацілася на 925. Альбо жыць нам стала лепей, альбо... Ня ўсякая надзея памірае апошняй, раз мы яшчэ жывыя.
Міхал Залескі