15.05.2000 / 13:00

Арцём Лук’яновіч. Хмары над Кісялём

№ 19 (176), 10 — 15 траўня 2000 г.


 

БТ вачыма беларуса

Хмары над Кісялём

 

Быццам бы знайшліся грошы на БТ-2. Інвэстарамі жадаюць быць ці расейскі бок («Ітэра» – газавыя магнаты), ці нават нямецкі. Тым часам пад шумок новых праектаў на БТ-1 ідзе прыхаваная барацьба. Кажуць, кагосьці з кіраўніцтва краіны з кіраўніком БТ Кісялём. Паводле чутак, нейкія людзі ў лукашэнкаўскай адміністрацыі адсочваюць у эфіры любую крамолу ды «капаюць» ужо не пад аўтараў падазроных праграмаў, а адкрыта пад Кісяля. А дысыдэнцтва час ад часу зьяўляецца: 26 красавіка была «Чарнобыльская рапсодыя», у якой праўду пра сёньняшнія чарнобыльскія праблемы казаў акадэмік Нікітчанка, старшыня аргкамітэту «Чарнобыльскага шляху-2000». Пару разоў выйшла невялічкая відэазамалёўка на верш Петруся Макаля з словамі пра тое, што не шанцуе беларусам на разумнае кіраўніцтва. Неістотна, што верш напісаны даўно — усё адно «паклёп на прэзыдэнта». Аўтараў, у адрозьненьне ад Беклямішава з «Кроку», ня звольнілі. Ува ўсім становіцца вінаваты старшыня БТ: нехта спрабуе выставіць Рыгора Кісяля таемным апазыцыянэрам і дывэрсантам. Кажуць, што хочуць скараціць вяшчаньне БТ-1 на карысьць БТ-2...

А з другога боку, Кісяля чакае суд. Звольнены Беклямішаў ды Беларуская Асацыяцыя Журналістаў падалі на яго ў суд за незаконнае звальненьне. Працэс мусіць адбыцца пры канцы траўня, прычым журналісты ўпэўненыя ў сваёй перамозе.

Падрыхтоўка ж новых праграмаў БТ пакуль нагадвае нядобрае памяці старыя. «Нашым песьням» Анатоля Ярмоленкі прарочаць сумны лёс іншых аўтарскіх праектаў творчых асобаў, ад прыроды эгаістычных, калі праграма ледзь не аўтаматычна ператвараецца ў «Мае песьні» Ярмоленкі. «Будні» ж, кажуць, выходзяць проста слабыя з прафэсійнага боку.

Арцём Лук’яновіч


Каб пакінуць каментар, калі ласка, актывуйце JavaScript у наладах свайго браўзеру