Антоні Радзівіл вярнуўся
Урна з прахам нашчадка беларускіх магнатаў у сераду была дастаўленая ў нашую краіну з Англіі. Для ўдзелу ў жалобнай цырымоніі ў Беларусь прыляцелі родныя Антонія Радзівіла – ягоная ўдава, два сыны й нявестка. Спадарыня Радзівіліха перадала ў дарунак Беларусі сямейную рэліквію – унікальную мапу нашае краіны, вырабленую напрыканцы ХVІ стагодзьдзя на замову князя Радзівіла Сіроткі. Уручаючы беларусам свой дар, госьця выказала спадзяваньне, што старажытная мапа дапаможа новым пакаленьням беларусаў спасьцігаць гісторыю Бацькаўшчыны.
У чацьвер у Нясьвіжы ва ўрачыстай атмасфэры адбылася цырымонія перапахаваньня Антонія Радзівіла – яго прах знайшоў вечны прытулак у крыпце Радзівілаў, што ў Фарным касьцёле. Каля трох гадзінаў доўжылася жалобная імша, пасьля якой адбыўся канцэрт-рэквіем, у часе якога сярод іншых музычных твораў прагучэлі й кампазыцыі, створаныя некалькі стагодзьдзяў назад радавітымі продкамі Антонія Радзівіла. Увечары госьці жалобнае цырымоніі былі запрошаныя на памінальную вячэру.
