Культура ў Полацку
Паводле Камю
Акторы мясцовага народнага драматычнага тэатру «Час» пад кіраўніцтвам Барыса Лівіна 14 чэрвеня прэзэнтавалі п’есу «Непаразуменьне» паводле Альбэра Камю. Акторы-аматары сабралі поўную залю. Воклічы адной з галоўных гераіняў п’есы аб тым, як ёй надакучыла сярод шэрасьці ды хочацца «да мора», каб адчуць сапраўдную свабоду, гучалі вельмі надзённа.
Андрэй Аляксандраў
«Накірункі сьвету»
За апошні год восем пісьменьнікаў і журналістаў з Полацку й Наваполацку былі прынятыя ў Беларускі ПЭН-цэнтар. Свае пасьведчаньні яны атрымалі ў мінулую сераду ў полацкім музэі-бібліятэцы Сімяона Полацкага з рук віцэ-прэзыдэнта Беларускага ПЭН-цэнтру Карласа Шэрмана.
У другой частцы сустрэчы адбылася прэзэнтацыя новай кнігі Карласа Шэрмана «Накірункі сьвету». Кніга складаецца з аднайменнай паэмы, напісанай па-гішпанску, і яе перакладаў на беларускую, ангельскую й расейскую мовы. Спадар Шэрман чытаў сваю паэзію па-гішпанску і па-беларуску. Затым ён распавёў гісторыю свайго жыцьця, пра знаёмствы з Нэрудам, Амаду, Маркесам.
Васіль Кроква, Полацак
Полацак на здымках
16 чэрвеня ў Полацку адкрылася фотавыстава пад старасьвецкай назвай «Там, дзе Палата сустракаецца зь Дзьвіною…» У ёй узялі ўдзел дзевяць фотамайстроў, сярод іх Эрнст Цецярэўскі, Алег Елькін, Анатоль Дубатоўка. Выстава прысьвечана Полацку канца ХХ ст. Практычна ўсе кнігі пра Полацак, якія пабачылі сьвет у беларускіх выдавецтвах за апошнія дваццаць гадоў, ілюстраваліся здымкамі Цецярэўскага (у тым ліку й хрэстаматыйная кніга Уладзімера Арлова «Таямніцы полацкай гісторыі»). Цяпер гэты фотамастак працуе на замову выдавецтва «Беларусь» над новым фотаальбомам пра родны горад. Сярод аўтараў выставы і адзін з кіраўнікоў полацкага рыцарскага клюбу «Жалезны воўк» Андрэй Мікалаеў. На ягоных фотаздымках — ваярскія подзьвігі сяброў клюбу.
Васіль Кроква, Полацак
