Вымярэньні — як ува ўсіх
Маю прапанову пісаць фізычныя адзінкі вымярэньня паводле міжнародна прынятых правілаў, то бок лацінкаю. Чаму мы павінныя калькаваць досьвед расейскіх навукоўцаў пачатку стагодзьдзя ды іхных савецкіх нашчадкаў, якія ўжывалі гэтыя кг, г, В, Вт, але чамусьці рабілі выключэньне для Ku (Кюры,) 0С (градусаў па Цэльсію) і г.д.
Калі ёсьць зразумелая ва ўсім сьвеце сыстэма напісаньня адзінак вымярэньня, навошта вынаходзіць ровар? Вяршыняй гэтай самаізаляцыйнае творчасьці выглядае «чыста» беларускае км/г (гэта што, кілямэтар на грам?).
Пакажыце мне бабулю з самай глухой вёскі, што не зразумее, калі на пакунку з крупой будзе напісана 4 kg; альбо знайдзіце, калі ласка, гэткага занядбанага электрыка, што палезе без пальчатак у шчытавую з надпісам 1000V.
Грэкі, кітайцы, японцы перадаюць адзінкі вымярэньня лацінкаю, маючы агулам нелацінічную графіку. Дый самі расейцы, вазьміце пакунак якіхсьці іхных сучасных цукерак ці батарэйку, не карыстаюць кірыліцу, пазначаючы вагу ці напружаньне.
Вадзім Карцаў
