Новыя кнігі, дасланыя ў рэдакцыю

 

Гістарычна-археалягічны зборнік. № 15 / Рэдакцыйна-выдавецкая група: В.Вяргей (кіраўнік) ды інш.; Навуковы рэдактар П.Лысенка. — Менск: Інстытут гісторыі Нацыянальнай акадэміі навук Беларусі, 2000. — 180 с., іл. — Наклад 215 ас. ISBN 985-6234-72-7

Першы “Гістарычна-археалягічны зборнік” быў выдадзены яшчэ ў 1927 г., у 1993 г. выданьне адноўлена. У гэтым выпуску беларускія археолягі зьмяшчаюць матар’ялы пра свае апошнія раскопкі й дасьледаваньні. У параўнаньні з папярэднімі выпускамі, у гэтым болей артыкулаў пра менскую даўніну. Каштуе 2400 руб., набыць можна толькі ў менскай “Акадэмкнізе”.

А.Глёбус. Тэксты: Парк. Адзінота на стадыёне. Сьмерць-мужчына. Скрыжаваньне. Дамавікамэрон. Толькі не гавары маёй маме… Круглы год. Койданава. Новы Дамавікамэрон. Post Scriptum. — Масква: Выдавецтва “АСТ”, 2000. — 1088 с. — Наклад 1000 ас. ISBN 5-17-001749-9

Упершыню ў адным томе сабраны ўсе творы А.Глёбуса апошніх гадоў. У кнігарнях “Белкнігі” прадаецца за 4500 руб.

Nihil: Часапіс для сапраўдных сымулякраў. № 1, 2000. — Менск, 2000. — 144 с., іл.

Другі нумар “Nihilu” — выданьня Новага фронту мастацтваў, ачольванага Міхасём Баярыным. У нумары друкуюцца Юрась Барысевіч, Андрэй Хадановіч, Канстанцін Міхееў, Гальяш Сін. Надрукаваны дзьве літаратурныя фальсыфікацыі, падпісаныя імёнамі В.Акудовіча й Адама Глёбуса. У адрозьненьне ад першага нумару часапісу, у гэтым — палова тэкстаў па-расейску. Выданьне густоўна аздоблена мастацкімі фотаздымкамі. Юрась Барысевіч разглядае часопіс “Nihil” як мастацкую альтэрнатыву часопісу “Arche”. Цана — 900—1000 руб.

І.Пташнікаў. Тартак: Аповесьць і апавяданьні. — Менск: Мастацкая літаратура, 2000. — 462 с. — (Беларуская проза ХХ стагодзьдзя). — Наклад 2200 ас. ISBN 985-02-0496-6

Кніга Івана Пташнікава “Тартак” працягвае “Залатую сэрыю” беларускай прозы, запачаткаваную выдавецтвам. Цана 850 руб.

Фрагмэнты філязофіі, культуралёгіі, літаратуры. 1-2, вясна 2000. — Менск, 2000. — 308 с.

Вясновы нумар “Фрагмэнтаў” мае тэму “Ідэя свабоды”. Сярод аўтараў нумару – І.Бабкоў, В.Акудовіч, С.Варывоцкі, С.Падокшын. Набыць можна ў сядзібах БНФ “Адраджэньне” і ТБМ. Цана — 1100 руб.

История Беларуси в документах и материалах / Авторы-составители И.Кузнецов, В.Мазец. — Менск: Амалфэя, 2000. — 672 с. — Наклад 4000 ас. ISBN 985-441-119-2

У хрэстаматыю ўвайшлі найважнейшыя дакумэнты: прывілеі, маніфэсты, загады, граматы, законы, матар’ялы пэрыядычнага друку, успаміны найвыдатнейшых дзеячаў беларускае мінуўшчыны. Значная доля матар’ялаў раней была невядомая шырокаму колу чытачоў. Сярэднявечныя тэксты друкуюцца ў перакладзе на беларускую, іншыя — па-расейску. І хаця амаль усе тэксты зборніка існуюць на беларускай мове, незразумела, чым кіраваліся складальнікі, выбіраючы мову публікацыі таго ці іншага дакумэнту. Каштуе 2600 руб.

Колокола времён: Популярный исторический журнал: Неизвестный Минск. Прогулка по затерянному городу. № 3, 2000. — Менск, 2000. — 16 с., іл. — Наклад 5000 ас. ISSN 1605-5381

Па-беларуску, па-ангельску й па-расейску ў папулярнай форме распавядаецца пра найцікавейшыя мясьціны старога Менску: Верхні горад (Катэдральны касьцёл, Койданаўскую вуліцу, будынак, дзе месьціўся Інстытут беларускае культуры, пажарнае дэпо канца ХІХ ст. на Гарадзкім вале, дом Ваньковіча), Аляксандраўскі сквер з скульптураю “Хлопчык і лебедзь”, вуліцу Падгорную (цяперашнюю Маркса), Чырвоны касьцёл на пляцы Незалежнасьці. Гэты нумар часапісу — найлепшая падарожная кніжка для вандровак па цэнтры сталіцы.

Падрыхтаваў Віктар Мухін