02.04.2001 / 13:00

Павал Севярынец. Хіба

№ 13 (222), 26 сакавіка — 2 красавіка 2001 г.


 Хіба

Памылка, нават дробная, часта выклікае вялікую блытаніну – асабліва калі вядзецца пра істотныя рэчы. Нездарма слова “грэх” адпачаткова пазначала памылку, хібу, якая вядзе чалавека да згубы.

 

У лісьце Натальлі Базылевіч, дзе распавядалася пра “пераменаўскае” сьвяткаваньне Дня сьв.Валянціна, я заўважыў адну памылку, якая сталася кропкай адліку ў разважаньнях аўтаркі. Насамрэч, сардэчкі зь біблійнымі цытатамі, што раздаваліся ўдзельнікам шэсьця, абменьваліся на АЎДЫЁКАСЭТУ “More каханьня” – БЕЗ аніякіх дадаткаў. Гэта ДНЁМ РАНЕЙ, 13 лютага, у клюбе “Акварыюм” Беларуская Музычная Альтэрнатыва разыгрывала такія касэты ў камплекце з “гумкамі”. Пісаць абвяржэньне тады я не палічыў патрэбным — быў упэўнены, што большасьць чытачоў “НН” альбо на свае вочы бачыла сьвята, альбо ведала пра ўсе акалічнасьці з мэдыяў.

Выявілася – дарма. У наступным нумары зьявіўся водгук Сержука Пятровіча з Барысава. Ізноў — разважаньні з памылковым пасылам.

Любыя мае браты й сёстры! Калі ласка, пільнуйцеся праўды. Несьвядомыя хібы й “здагадкі” часам больш небясьпечныя за яўныя памылкі. Хто хоча даведацца, што Малады Фронт робіць ува Хрысьце — прыходзьце на сустрэчы, пачуеце САМІ. Чытайце выпускі маладафронтаўскага “Весьніка”, артыкулы й праграмы — і пабачыце САМІ. У пачатку красавіка (сачыце за абвесткамі) у нас чарговая канфэрэнцыя “Хрысьціянскай ініцыятывы”. Завітвайце. І — крыху цярпеньня — каб часам перапытаць, патэлефанаваць, удакладніць. “Цярплівасьць жа мае дасканалае дзеяньне, каб вам быць дасканалымі ва ўсёй паўнаце, без аніякае пахібы” (Якуба, 1:4).

Зь любоўю, Павал Севярынец


Каб пакінуць каментар, калі ласка, актывуйце JavaScript у наладах свайго браўзеру