15.06.2007 / 09:52

Арыштаваны кіраўнік Шклоўскай гарадзкой арганізацыі Партыі БНФ Аляксандр Фёдараў 1

Яму інкрымінуюць атрыманьне заработнай платы за «мёртвага» чалавека

Майстар кацельных Шклоўскай жыльлёва‑камунальнай гаспадаркі Аляксандр Фёдараў быў арыштаваны сёньня ў 14:20 14 чэрвеня. У 19:00 міліцыянты ўчынілі ператрус у хаце Аляксандра Фёдарава й яго жонкі.

У 21:00 кіраўнік Магілёўскай абласной арганізацыі Партыі БНФ Рыгор Кастусёў атрымаў тэлефонны званок ад арыштаванага. Аляксандр Фёдараў паведаміў, што яму інкрымінуюць атрыманьне заработнай платы за «мёртвага» чалавека, а таксама сказаў спадару Кастусёву, што абвінавачваньне беспадстаўнае.

Зараз Аляксандр Фёдараў знаходзіцца ў камэры часовага затрыманьня ў Шклове. Праз тры дні яму мусяць выставіць абвінавачваньне.

«Ужо была спроба звольніць Аляксандра ў 2003 годзе падчас кампаніі мясцовых выбараў, — кажа Рыгор Кастусёў. — Тады ён працаваў у маёй камандзе, і пасьля выбараў пачаліся сур’ёзныя праблемы на працы. Тым ня менш Аляксандр Фёдараў лічыцца вельмі прафэсійным працаўніком, і нядаўна пад яго нагляд было перададзена яшчэ дзьве кацельныя».

Рыгор Кастусёў некалькі год таму назад працаваў дырэктарам Шклоўскай Жыльлёва‑камунальнай гаспадаркі. У 2001 годзе на працягу двух месяцаў улады шукалі кампрамат на яго, каб звольніць з працы.

«Аляксандр Фёдараў — адзін з найбольш паважаных фронтаўцаў Магілёўшчыны, — кажа лідэр Партыі БНФ Вінцук Вячорка. — Я не сумняюся ў тым, што гэты арышт — частка кампаніі перасьледу рэгіянальных лідэраў дэмакратыных сілаў. Перакананы, што справа Аляксандра Фёдарава — гэта справа палітычная. Мы будзем патрабаваць вызваленьня Аляксандра зь вязьніцы й празрыстасьці ўсіх сьледчых дзеяньняў над ім. Ён павінен быць на свабодзе. Знаходзячыся ў вязьніцы, чалавек ня можа рэальна бараніцца. Першае, што мусяць зрабіць улады зараз, — вызваліць усіх палітзьняволеных. І мы будзем патрабаваць вызваліць Аляксандра Фёдарава, як і астатніх палітычных вязьняў».

Прэс-група Партыі БНФ

0
мазэпа / Адказаць
15.06.2007 / 22:52
Патрабаваць ? Якім чынам? Мо праз Буша? Лепш выкупіць!
Каб пакінуць каментар, калі ласка, актывуйце JavaScript у наладах свайго браўзеру