15.10.2001 / 13:00

Беларусь ня ў Радзе Бясьпекі

№ 42 (251), 15 кастрычніка 2001 г.


Беларусь ня
ў Радзе Бясьпекі

Зь пяці спробаў за 32 гады — чатыры няўдалыя

Наш сярэднеэўрапейскі рэгіён у Радзе Бясьпекі мінулыя два гады прадстаўляла Ўкраіна. Беларусь хацела абрацца ёй на зьмену, але прайграла    на выбарах Баўгарыі, якая набрала ўдвая больш галасоў.

Упершыню Беларусь паспрабавала трапіць у Раду Бясьпекі ў 1969 г., але беспасьпяхова. Тое самае паўтарылася ў 71-м. Толькі ў 1973 г., пасьля інтэнсіўнай падрыхтоўкі (прадстаўнік БССР Віталь Сьмірноў асабіста сустракаўся з Джорджам Бушам-старэйшым, тагачасным паслом Амэрыкі ў ААН, пераконваў у значнасьці Беларусі для сьвету, нагадваў пра людзкія страты ў другой сусьветнай вайне), Беларусь была абраная ў Раду Бясьпекі. За яе прагаласавалі 118 са 124 прысутных. У выніку мы на працягу двух гадоў баранілі віетнамцаў, намібійцаў, тубыльцаў Паўднёвай Радэзіі ды астравоў Мікранэзіі...

У 1995-м ужо Рэспубліка Беларусь ізноў паспрабавала трапіць у Раду Бясьпекі, але прайграла Чэхіі. Цяпер вось — Баўгарыі. Як і за БССРаўскім часам, дзьве першыя спробы — няўдалыя. Відаць, ня дужа аўтарытэтная пакуль наша дзяржава ў сьвеце.

Сяргей Рак

Рада Бясьпекі ААН складаецца з 5 сталых сяброў — Вялікай Брытаніі, ЗША, Кітаю, Расеі й Францыі — і 10 часовых, што абіраюцца ад розных рэгіёнаў сьвету на два гады. На сёньняшні дзень гэта Ірляндыя, Банглядэш, Ямайка, Малі, Туніс, Калюмбія, Маўрыкі, Нарвэгія, Сынгапур, Украіна.


Каб пакінуць каментар, калі ласка, актывуйце JavaScript у наладах свайго браўзеру