Навіны
Спорт на службе палітыкі
Спартоўцы з Украіны, Беларусі, Эстоніі, Літвы і Латвіі паедуць у Маскву на гульні краін СНД і Балтыі, што праходзяць 14—15 чэрвеня, хоць кансэрватыўныя партыі гэтых краін заклікаюць да байкоту спаборніцтваў. Літоўцы, напрыклад, гэтымі днямі якраз адзначаюць гадавіну пачатку савецкай акупацыі і масавых высылак у Сібір. Кансэрватары ў краінах захаду былога СССР перакананыя, што гульні — гэта палітычная маніпуляцыя, пры дапамозе якой Расея хоча прадэманстраваць, што былыя савецкія рэспублікі ня выйшлі зь яе сфэры ўплыву.
Гамакі для малпаў
Другі тыдзень у Калінінградзкім заапарку працуюць заолягі зь Вялікай Брытаніі Лі Батлер і Джуліян Бафэры. Яны паляпшаюць умовы жыцьця тамтэйшых малпаў. Прыматам патрэбныя велізарныя вальеры, тады як калінінградзкія гібоны ды шымпанзэ сядзяць у цесных клетках. А кепскія жыльлёвыя ўмовы адбіваюцца ня толькі на здароўі, але й на характары жыхароў заапарку. Дзякуючы ангельскім заолягам, у клетках калінінградзкіх малпаў ужо зьявіліся шыкоўныя гамакі.
Міхась Васілевіч
Этнічная чыстка ў Емэне
Урад Емэну ва ўмовах поўнай сакрэтнасьці дэпартаваў ў Ізраіль блізу 300 емэнскіх габрэеяў. Ён зьбіраецца выслаць з краіны ўсіх габрэяў да аднаго. Як сьцьвярджаецца, гаворка йдзе не аб гвалтоўнай дэпартацыі, а аб “таемным пагадненьні паміж урадамі Ізраілю і Емэну”.
Памёр “хросны бацька” ЗША
Джон Гоці, галава найбольшага ў ЗША мафіёзнага клану Гамбіна, памёр у панядзелак у турме штату Місуры ад раку горла. Ягоны клан налічваў 300 “аўтарытэтаў” і 3 тысячы шараговых зладзеяў, якія, сярод іншага, кантралявалі ў Нью-Ёрку вываз сьмецьця, нелегальны таталізатар, прастытуцыю і большую частку тэндэраў на дзяржаўныя падрады. Гоці сябраваў з журналістамі і любіў, калі яго параўноўвалі з Аль Капонэ. Шмат год ён унікаў турмы, падкупляючы прысяжных і забіваючы сьведак. Толькі ў 1991 г. ФБР здолела засадзіць яго за краты з дапамогай сучасных тэхналёгій падслухоўваньня. Рэшту жыцьця ён прасядзеў у падземнай камэры бяз вокнаў.
Б.Т.
