Сябры КХП супраць пабудовы калектару
У Курапатах аднавілася супрацьстаяньне. Нядаўна ва ўрочышча прывезьлі трубы для будаўніцтва сьцёкавага калектара і склалі якраз на тым месцы, дзе раней стаяў намёт. Потым будаўнікі пачалі іх апрацоўваць – абмазваць адмысловай смалой. Але завяршыць гэтую справу ім не давялося: у часе абеду, калі рабочых не было каля труб, абмазка зьнікла. А лес у Курапатах не такі ўжо малы, каб у ім лёгка было знайсьці схаванае. Таму праца была прыпыненая на колькі дзён.
Тым часам будаўнікі пачалі капаць экскаватарам траншэю пад трубы. За паўдня яна працягнулася ад дарогі да лесу. Але па абедзе ў Курапатах зьявіліся сябры КХП-БНФ ды не пусьцілі тэхнікі ва ўрочышча. Будаўнікі не рызыкнулі душыць людзей – разьвярнуліся і зьехалі. Нехта прынёс рыдлёўку і пачаў закопваць вялізную, даўжынёю мэтраў 15, траншэю. Потым знайшлася яшчэ адна рыдлёўка, і яшчэ... Працавалі да ночы.
Назаўтра сябры партыі зусім закапалі тую траншэю. Удзельнікі гэтай акцыі кажуць, што не дазволяць ператварыць у балота месца апошняга спачыну ахвяраў сталінскіх рэпрэсіяў. Бо трубы выводзілі б ваду, якая цячэ па ліўневых сьцёках уздоўж кальцавой дарогі, якраз на месца пахаваньняў.
Г.Р.
