навіны гаспадарскія
ЗА ВЫРАБ САМАГОНКІ неўзабаве будзе ўведзеная крымінальная адказнасьць. Абавязковай стане й маркіроўка ўсіх алькагольных напояў. Сёньня без акцызных марак прадаюцца дарагія віны, каньякі і бальзамы — агулам гэта пад 400 млн. пляшак у год.
НА 48,5 МЛН. ДАЛЯРАЎ павялічыліся сёлета валютныя рэзэрвы Беларусі. Яны складаюць 252,9 млн. даляраў. Залаты запас краіны — 10,1 тоны. Золата маем столькі ж, колькі і ў пачатку году.
ТАКСОЎКІ ПАДАРАЖЭЛІ на 20%. Цяпер за кожны кілямэтар днём (ад 6 да 22-й) давядзецца плаціць 550, уначы (ад 22 да 6-й) — 825, за замову таксоўкі — 500 рублёў.
37,8 МЛН. ДАЛЯРАЎ складаюць запазычанасьці па заробках. Найбольш завінаваціліся сваім працаўнікам калгасы і саўгасы — за 26 млн.
450 ТЫС. ДАЛЯРАЎ даў на ліквідацыю наступстваў надзвычайных здарэньняў урад. Большая частка грошай пойдзе на дэзактывацыю пунктаў перагрузкі ўранавай руды ў Берасьці.
КАСАВЫЯ АПАРАТЫ ДЛЯ КВІТКОЎ усталююць у прыгарадных аўтобусах Меншчыны. Гэткім чынам будуць змагацца з кіроўцамі і кандуктарамі, якія бяруць з пасажыраў грошы, але не даюць квіткі.
ДВА НОВЫЯ ПРАДПРЫЕМСТВЫ пачнуць працаваць у вольнай эканамічнай зоне “Менск”. Беларуска-амэрыканскае прадпрыемства “Нафта” будзе вырабляць мазуту і кацельнае паліва, а польска-расейскае прадпрыемства “Столкар” — мэблю. Прадпрыемствы абяцаюць укласьці ў эканоміку краіны пад 5 млн. даляраў цягам 5 гадоў.
КРЭДЫТ на 30 млн. даляраў дадуць Менскаму трактарнаму заводу. Наўзамен урад патрабуе, каб МТЗ павялічыў выраб і продаж трактароў больш чым удвая — да 50 тыс. у год.
ФІРМОВЫ ЦЯГНІК “ГОРАДНЯ–МАСКВА” пачаў курсаваць па адпаведным маршруце. У яго складзе — вагон СВ, 5 купэйных і 5 пляцкартных, а таксама вагон-рэстаран.
450 ТЫС. ДАЛЯРАЎ трэба Гарадзенскаму кансэрваваму заводу, каб распачаць вытворчасьць канцэнтраванага яблычнага соку. Прадпрыемства зьбіраецца набыць сучаснае заходняе абсталяваньне. Тэрмін рэалізацыі праекту — год. Акупіцца ён за 2 гады. Завод прапануе інвэстарам стварыць сумеснае прадпрыемства.
С.І.