У Менску затрыманы намесьнік Радуева
У найбліжэйшыя дні Міністэрства ўнутраных спраў Беларусі дэпартуе ў Расею Сайпудзі Ўмхаева, былога першага намесьніка Салмана Радуева. Чачэнцу, які жыў тут апошнія месяцы, вельмі спадабалася Беларусь, бо “тут ня ходзяць людзі з аўтаматамі, не правяраюць на кожным кроку дакумэнты”.
Сайпудзі Ўмхаеў быў затрыманы кадэбістамі ў Менску 29 жніўня. Паводле інфармацыі спэцслужбаў, чачэнец быў першым намесьнікам Салмана Радуева, камандуючага “арміі генэрала Дудаева”. Дый Умхаеў не хаваўся — прадстаўнікі пашпартна-візавай службы яго нават папярэджвалі, каб зарэгістраваўся ў нашай краіне. Спэцслужбы чачэнца не чапалі, адно ўсталявалі апэратыўнае сачэньне.
Паводле словаў кіраўніка Цэнтру інфармацыі й грамадзкіх сувязяў КДБ Фёдара Котава, пры канцы жніўня стала відавочна, што Ўмхаеў “зьбіраецца распачаць крымінальны бізнэс”. І КДБ вырашыў дэпартаваць чачэнца. Пасьля затрыманьня С.Умхаеў быў перададзены ў юрысдыкцыю МУС, бо ня зьдзейсьніў дзяржаўных злачынстваў, а толькі адміністрацыйнае.
Магчыма, Умхаеў не адзіны чачэнскі камандзір, які хаваецца ў Беларусі. Яшчэ пры канцы 90-х у замежным друку зьявілася інфармацыя, што цяжка паранены ў Чачэніі Салман Радуеў ехаў лячыцца ў Нямеччыну праз нашу краіну. Фёдар Котаў, аднак, пра такі факт нічога ня чуў. Ён лічыць, што “легендаў такога кшталту яшчэ зьявіцца нямала”.
Дэпартацыя былога чачэнскага камандзіра ў Расею ва ўмовах абвастрэньня адносінаў паміж афіцыйным Менскам і Масквой мае і палітычны падтэкст. Камэнтатар радыё “Свабода” мяркуе, што рэжым Лукашэнкі цішком зрабіў свайго роду падарунак расейскім уладам. Але Ўмхаеў Расеі не патрэбны: праваахоўныя органы яго не шукаюць. КДБ дапускае, што ў Расеі чачэнец мог трапіць пад амністыю. Ці гэта так, на сто працэнтаў не пацьвярджаюць. У цэнтры грамадзкіх сувязяў ФСБ Расеі пракамэнтаваць сытуацыю адмовіліся, спаслаўшыся на “непадрыхтаванасьць”. Тым ня менш, не пазьней за 15 верасьня былы паплечнік Салмана Радуева, расейскі грамадзянін Сайпудзі Ўмхаеў пакіне Беларусь.
Алег Тачоны
