Бестэрміновасьць у адносінах
Прадпрымальнікі Беларусі зьбіраюцца аднавіць бестэрміновы страйк. Перамовы лідэраў прадпрымальнікаў з урадам зайшлі ў тупік.
Аб’яднаная рада прадпрымальнікаў (АРП) абвесьціла страйк яшчэ 1 верасьня, аднак праз тыдзень усе прадпрымальнікі выйшлі на працу: пачаліся перамовы з урадам. Але вынікаў яны ня мелі. Паводле АРП, ніводнае іхнае патрабаваньне Саўмін ня выканаў. Галоўныя патрабаваньні прадпрымальнікаў — адмяніць абавязковае ўвядзеньне касавых апаратаў і сацыяльнае страхаваньне, зьменшыць арэндную плату за гандлёвыя месцы. Прадпрымальнікі атрымалі толькі вусныя абяцаньні галоўнага архітэктара Менску, што сталічныя рынкі “Трактар”, “Чэрвеньскі” і “Байкальскі кірмаш”, якія ўлады меліся сёлета зачыніць, прапрацуюць яшчэ і 2003 г.
Таму Аб’яднаная рада папрасіла аўдыенцыі ў Аляксандра Лукашэнкі, “каб канчаткова высьветліць, як прэзыдэнт ставіцца да прадпрымальнікаў”. Адзін зь лідэраў АРП Анатоль Шумчанка заяўляе, што новы бестэрміновы страйк пачнецца 1 кастрычніка й працягнецца... тыдні два, пасьля чаго прадпрымальнікі зноў паспрабуюць пачаць перамовы з урадам. Калі і яны скончацца безвынікова, з 1 лістапада прадпрымальнікі зноў ня выйдуць на працу.
Страйкі балюча адбіваюцца на бюджэце. “Штомесяц мы кладзём у дзяржаўную скарбонку 20 млн. даляраў: сплачваем адзіны падатак ад 80 даляраў і вышэй (на выставах — да тысячы), а ў сярэднім па краіне — 120 даляраў. Плюс грошы за арэнду”, — кажа А.Шумчанка.
Прадпрымальнікі таксама страцяць ад прастою, але сёньняшняе становішча трываць не жадаюць. Адзін толькі касавы апарат каштуе 200—400 даляраў. А яго ўсталяваньне цягне за сабой неабходнасьць мець разьліковы рахунак у банку. І любую фінансавую апэрацыю — а дробныя бізнэсоўцы праварочваюць за дзень некалькі гэткіх гешэфтаў — трэба праводзіць праз банк, адстойваць там чэргі. Банкаўскае ж абслугоўваньне разьліковага рахунку абыходзіцца ў 9% ад зьмешчанай на ім сумы. Каб разабрацца ў справаздачнасьці, прадпрымальніку давядзецца яшчэ наймаць бухгальтара.
Пра штрафы — асобна: за парушэньне парадку прыёму наяўных грошай трэ будзе плаціць 25—50 базавых велічыняў (1 б.в. — 11000 руб.), па разьліковым рахунку — 10 базавых велічыняў.
Яшчэ адна болевая кропка — адсутнасьць агульных ставак адзінага падатку: у Заслаўі бяруць 70 эўра, на менскіх рынках — 5. Права вызначаць памеры падатку перададзенае мясцовай вэртыкалі.
Не жадаюць прадпрымальнікі плаціць грошы і за абавязковую сацыяльную страхоўку. Урад вымушаны быў працягнуць тэрмін выплаты ўнёскаў. “Не заплацім у час — тэрмін працягнуць яшчэ”, — сьцьвярджае А.Шумчанка.
У адносінах ураду і прадпрымальнікаў, як бачым, запанавала поўная бестэрміновасьць.
Глеб Хмяльніцкі
