***

Сталі вядомыя вынікі муніцыпальных выбараў у Польшчы, на якія беларусы ўпершыню выйшлі як самастойная палітычная сіла.

Беласток. Беларускаму выбарчаму камітэту не хапіла 0,9% галасоў, каб трапіць у Соймік сталіцы Падляскага ваяводзтва. Беларусы атрымалі 4,1%, ці больш за 15,5 тысячаў галасоў, пры неабходных 5%.

У склад БВК не ўвайшлі прадстаўнікі Беларускага грамадзка-культурнага таварыства (БГКТ). Яны абіраліся па сьпісах СЛД і атрымалі ў Сойміку два месцы. Дэпутатамі сталі Ян Сычэўскі, вядомы сваімі заявамі ў падтрымку Лукашэнкі, і Ян Зэнюк, дзяяч беластоцкага праваслаўнага асяродзьдзя, які за часамі ПНР заклікаў да забароны беларускай мовы.

Прафэсар Антон Мірановіч, кандыдат ад БВК на пасаду мэра Беластоку, сярод 12 кандыдатаў апынуўся на 5-м месцы, набраўшы 6,5% галасоў.

Бельск-Падляскі. Тут Кааліцыя Бельская, у якую ўваходзяць беларускія і ўкраінскія арганізацыі, перамагла, атрымаўшы ў Радзе 8 месцаў з 21. У Бельскім павеце кааліцыя заняла другое месца пасьля СЛД, узяўшы 5 мандатаў з 19-ці. Пасаду бурмістра Бельску-Падляскага ўтрымаў беларус Андрэй Сьцепанюк, які набраў 84,2% галасоў.

Гайнаўка. У Радзе гораду Беларускі народны выбарчы камітэт (БНВК) заняў другое месца, атрымаўшы 5 мандатаў з 21, а ў павеце 5 з 17-ці. Аднак левыя, якія выйгралі тут выбары, змогуць утварыць кааліцыю зь іншымі палітычнымі сіламі, і голас беларусаў ня будзе вырашальным. На пасаду бурмістра Гайнаўкі БНВК кандыдата не выстаўляў.

Уся Польшча. У большасьці ваяводзтваў перамаглі прадстаўнікі кіроўнай кааліцыі СЛД —Унія Працы (УП), аднак не з такой перавагай, як спадзяваліся; большасьць жа вялікіх гарадоў узначалілі прадстаўнікі правых.

Аналітыкі кажуць, што кааліцыя СЛД—УП, якая знаходзіцца пры ўладзе крыху больш за год, ужо паказала сваё аслабленьне.

У Польшчы органы самакіраваньня маюць значную ўладу і не залежаць ад “цэнтру”. Гэта робіць дэпутацтва ў мясцовых радах прывабным. Менавіта мясцовыя ўлады будуць вырашаць лёс вялізных сумаў грошай, якія атрымаюць польскія рэгіёны зь бюджэту Эўразьвязу пасьля 1 студзеня 2004 г.

Аляксей Дзікавіцкі, Варшава